ଭୁବନେଶ୍ବର: ଆଜି(ସୋମବାର) ବିଜେଡି ପକ୍ଷରୁ ହୋଇଥିବା ପ୍ରେସମିଟର ଜବାବ ରଖିଛି ବିଜେପି । ପ୍ରେସମିଟ କରି ବିଜେଡି ଉପରେ ପ୍ରବଳ ବର୍ଷିଛନ୍ତି ବିଜେପିର ସାଧାରଣ ସମ୍ପାଦକ ଲେଖାଶ୍ରୀ ସାମନ୍ତ ସିହାଂର । ଚାଷୀମାନଙ୍କ ସମସ୍ୟା ନେଇ ବିଜେଡି ଯେଉଁ ପ୍ରସମିଟ୍ କରିଥିଲେ, ତାହାସହ ତାଳମେଳ ନଥିବା ବୋଲି କହିଛନ୍ତି ଲେଖାଶ୍ରୀ ସାମନ୍ତସିହାଂର ।
ଚାଷ ଓ ଚାଷୀ ପ୍ରସଙ୍ଗରେ ବିଜେଡିକୁ କାଉଣ୍ଟର କରିଛି ବିଜେପି । ବିଜେଡି ସାମ୍ବାଦିକ ସମ୍ମିଳନୀ କରି ବିଜେପି ଓ କେନ୍ଦ୍ର ସରକାରଙ୍କ ଉପରେ ବର୍ଷିଥିଲା। ଉଷୁନା ଚାଉଳ, ବକେୟା ସବସିଡି ସାଙ୍ଗକୁ ସ୍ବାମୀନାଥନ କମିଟି ସୁପାରିଶ ଲାଗୁ କରିବାକୁ କହିଥିଲା। ଯାହାର ଜବାବରେ ବିଜେପି ରାଜ୍ୟ କୃଷକ ମୋର୍ଚ୍ଚା ସଭାପତି ପ୍ରଦୀପ ପୁରୋହିତ କହିଛନ୍ତି, ଧାନ ସଂଗ୍ରହରେ ବ୍ୟାପକ ତ୍ରୁଟି ଦେଖା ଦେଇଛି। ଚାଷୀ ଧାନ ବିକ୍ରି କରି ପାରୁନି। ଟୋକାନ ମିଳୁନି, ମିଳିଲେ ବି ତାହା ଲ୍ୟାପସ କରିଯାଉଛି। ନାହିଁ ନଥିବା ସମସ୍ୟା ମଣ୍ଡିରେ ଦେଖାଦେଉଛି। ପରିବହନ, ସୁତୁଲି, ବ୍ୟାଗ ବାବଦ ଅର୍ଥ ହରିଲୁଟ ହେଉଛି।
କ୍ବିଣ୍ଟାଲ ପିଛା କେନ୍ଦ୍ର ଦେଉଥିବା ଏମଏସପି ଚାଷୀଙ୍କୁ ମିଳୁନାହିଁ। ଯାହାକୁ ନେଇ ଆଗାମୀ 21ରେ ବିଜେପି ସମ୍ବଲପୁର ଆରଡିସି ଅଫିସ ଘେରାଓ କରିବାକୁ କହିଛି। ସେଥିପାଇଁ ବିଜେଡି ଔଷଧ ବିକଳରେ ତାଟିଆ କାମୁଡୁଛି ବୋଲି କହିଛନ୍ତି ପ୍ରଦୀପ ପୁରୋହିତ।