ସ୍ମାର୍ଟସିଟିରେ ସ୍ୱଚ୍ଛତା ମାସ ପାଳିତ: ପଲିଥିନ ବ୍ୟବହାରକାରୀଙ୍କୁ ତାଗିଦ କଲେ BMC ମେୟର

ସହରର ସ୍ବଚ୍ଛତାକୁ ଆଉ ପାଦେ ଆଗେଇ ନେବାକୁ ଭୁବନେଶ୍ବରରେ ଆରମ୍ଭ ହେଲା ସ୍ୱଚ୍ଛତା ମାସ । ପଲିଥିନ ବ୍ୟବହାର ଉପରେ କଡା ଆଭିମୁଖ୍ୟ ପୋଷଣ କଲେ ବିଏମସି ମେୟର ସୁଲୋଚନା ଦାସ । ଅଧିକ ପଢନ୍ତୁ

ଭୁବନେଶ୍ବର: ସହରର ସ୍ବଚ୍ଛତାକୁ ଆଉ ପାଦେ ଆଗେଇ ନେବା ପାଇଁ ଆରମ୍ଭ ହେଲା ସ୍ୱଚ୍ଛତା ମାସ । ପ୍ରୋ ପାୱାର ସ୍ୱିପିଂ କମ୍ପାନୀ, ଲାୟନ୍ସ ଓ ବିଏମସିର ମିଳିତ ଆନୁକୂଲ୍ୟରେ ଜୁନ ୫ତାରିଖ ଠାରୁ ଜୁଲାଇ ୫ତାରିଖ ପର୍ଯ୍ୟନ୍ତ ଦୀର୍ଘ ଏକ ମାସ ଧରି ସ୍ୱଚ୍ଛତା ମାସ ପାଳନ କରାଯାଉଛି । ଏହି ଅବସରରେ ଆଜି(ବୁଧବାର) ସିଆରପି ଛକରେ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଛି ।

କାର୍ଯ୍ୟକ୍ରମରେ ଭୁବନେଶ୍ୱର ମେୟର ସୁଲୋଚନା ଦାସ ମୁଖ୍ୟ ଅତିଥି ଭାବେ ଯୋଗଦେଇ ସମସ୍ତଙ୍କୁ ଏହି ଅଭିଯାନରେ ସାମିଲ ହେବାକୁ ଆହ୍ୱାନ କରିଛନ୍ତି । ଦୋକାନରୁ ହେଉ ଅଥବା ଘରୁ ବାହାରୁଥିବା ଅଳିଆ ଓ ବର୍ଜ୍ୟବସ୍ତୁକୁ ଏଣେତେଣେ ନ ଫୋପାଡି ଅଳିଆପାତ୍ର ବା ଡଷ୍ଟବିନରେ ପକାଇବାକୁ ସେ ପରାମର୍ଶ ଦେଇଛନ୍ତି । ସେପଟେ ପଲିଥିନ ନିଷିଦ୍ଧ ଘୋଷଣା ସତ୍ତ୍ୱେ ଏହାର ବ୍ୟବହାର ହେଉଥିବା ଦେଖିବାକୁ ମିଳିଛି, ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତ BMC ମେୟର ।

ପଲିଥିନକୁ ବିକ୍ରି ଉପରେ ଚଢ଼ାଉ ଓ କାର୍ଯ୍ୟାନୁଷ୍ଠାନ ଗ୍ରହଣ କରିବା ନେଇ ସେ ଗୁରୁତ୍ୱ ଦେଇଛନ୍ତି । ଏପରିକି ଦୋକାନୀଙ୍କୁ ପଲିଥିନ ବ୍ଯବହାର ନେଇ ତାଗିଦ କରିଛନ୍ତି ମେୟର ସୁଲୋଚନା । ଆଗକୁ ଏହାର ବ୍ଯବହାର ନ କରି କାଗଜର ବ୍ଯବହାର ସହ ପଲିଥିନ ମୁକ୍ତ ସହର ଗଠନରେ ସହାୟତା କରିବା ପାଇଁ ଆହ୍ୱାନ କରିଛନ୍ତି । ଏହି କାର୍ଯ୍ୟକ୍ରମରେ ସହରର ସ୍ବଚ୍ଛତାରେ ସହାୟତା କରୁଥିବା ସ୍ବଚ୍ଛ ସାଥୀ ଓ ସ୍ଥାନୀୟ କର୍ପୋରେଟର ମଧ୍ୟ ଉପସ୍ଥିତ ଥିଲେ ।

ଇଟିଭି ଭାରତ, ଭୁବନେଶ୍ବର