ଭୁବନେଶ୍ବର: ଡ୍ରେନରେ ଭାସିଯାଇ ଛାତ୍ର ମୃତ୍ୟୁ ଘଟଣାକୁ ଦୃଢ ପ୍ରତିବାଦ କରିଛି ରାଜ୍ୟ ଛାତ୍ର କଂଗ୍ରେସ । ଆଜି ରାଜଧାନୀରେ ଡ୍ରେନରେ ଭାସି ଯାଇ ଛାତ୍ର ମୃତ୍ୟୁ ଘଟଣାକୁ ନେଇ ରାଜ୍ୟ ସରକାରଙ୍କୁ ସିଧାସଳଖ ଦାୟୀ କରିଛି ଛାତ୍ର କଂଗ୍ରେସ । ଏହାସହ ବିଏମସି ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ସହ ବଦଳି ଦାବି କରିଛି ଛାତ୍ର କଂଗ୍ରେସ ।
ରାଜଧାନୀର ଡ୍ରେନରେ ଭାସିଯାଇ ୧୫ ବର୍ଷିୟ ଛାତ୍ର ମୃତ୍ୟୁ ଘଟଣାକୁ ନେଇ ମଙ୍ଗଳବାର ରାଜ୍ୟ ଛାତ୍ର କଂଗ୍ରେସ ସଭାପତି ୟାସିର ନବାଜଙ୍କ ନେତୃତ୍ବରେ ଜୋରଦାର ବିରୋଧ ପ୍ରଦର୍ଶନ କରାଯାଇଛି । ରାଜ୍ୟ ସରକାରଙ୍କ ବିଫଳତା ଯୋଗେ ଏଭଳି ଘଟଣା ଘଟିଛି । ଛାତ୍ର କଂଗ୍ରେସ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା, ମନ୍ତ୍ରୀ ଅଶୋକ ପଣ୍ଡା, ବିଏମସି କମିଶନର ସଞ୍ଜୟ ସିଂଙ୍କୁ ଜୋରଦାର ବିରୋଧ କରି ତାଙ୍କ ଫଟୋ ଚିତ୍ରକୁ ପୋଡିଥିଲେ ଛାତ୍ର କଂଗ୍ରେସ । ଏହା ସହ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନାଙ୍କ ଇସ୍ତଫା ଦାବି କଲା କଂଗ୍ରେସ । ବିଏମସି ଅଧିକାରୀଙ୍କ ମନମୁଖୀ କାର୍ଯ୍ୟ ଓ ରାଜଧାନୀରେ ଡ୍ରେନେଜ ସମସ୍ୟା ବିପର୍ଯ୍ୟସ୍ତ ହୋଇପଡଛି । ଯାହା ଫଳରେ ଏଭଳି ଅଭାବନୀୟ ଘଟଣା ଘଟିଛି ବୋଲି ଛାତ୍ର କଂଗ୍ରେସ କହିଛି । ବିଏମସି ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ସହ ବଦଳି ଦାବି କରିଛି । ମନ୍ତ୍ରୀ ଅଶୋକ ପଣ୍ଡାଙ୍କ ବିରୋଧରେ ନାରାବାଜି ଦେଇଥିଲେ ଛାତ୍ର କଂଗ୍ରେସ। ମୃତ ଛାତ୍ରଙ୍କ ପରିବାରକୁ ୫୦ ଲକ୍ଷ ଟଙ୍କା ସହାୟତା ରାଶି ଘୋଷଣା କରିବା ପାଇଁ ଛାତ୍ର କଂଗ୍ରେସ ଦାବି କରିଛି ।