ନିଶା କାରବାର ପଛରେ ଗ୍ୟାଙ୍ଗଷ୍ଟାରଙ୍କ ହାତ

ରାଜଧାନୀରେ ଛୋଟ ନିଶା ବେପାରୀଙ୍କ ପଛରେ ଅଛନ୍ତି ବଡ ଗ୍ୟାଙ୍ଗଷ୍ଟାର । ଏହାକୁ ତଦନ୍ତ କରିବ ସ୍ପେଶାଲ ଟାସ୍କ ଫୋର୍ସ ।

ଭୁବନେଶ୍ବର: ଗ୍ୟାଙ୍ଗଷ୍ଟାର ଛୋଟାର ଅପରାଧିକ ସାମ୍ରାଜ୍ୟ ଉପରେ ଖୋଳତାଡ଼ କରୁ କରୁ ପଦାକୁ ଆସିଲା ନିଶା କାରବାରର ଗୁମର । ପଥର ଖାଦାନଠାରୁ ଆରମ୍ଭ କରି ବିଭିନ୍ନ ଗ୍ୟାଙ୍ଗଷ୍ଟାରଙ୍କୁ ବ୍ରାଉନସୁଗାର ଯୋଗାଉ ଦେଉଛନ୍ତି କିଛି ନିଶା ବେପାରୀ । ସେଥି ମଧ୍ୟରୁ ଜିଲ୍ଲାର 3ଜଣ ନିଶା ବେପାରୀଙ୍କୁ ଗିରଫ କରିଛି ଏସଟିଏଫ। ଛୋଟାର ବେଆଇନ ଖଣି ଉପରେ ତଦନ୍ତ କରିବା ସମୟରେ ନିଶା କାରବାର ବିଷୟରେ ଜାଣିବାକୁ ପାଇଥିଲା ଏସଟିଏଫ । ତେବେ ଏହି ତିନିଜଣ, ଗ୍ୟାଙ୍ଗଷ୍ଟାର ମାନଙ୍କ ସହ କିପରି ସମ୍ପର୍କ କରୁଥିଲେ ସେ ନେଇ ଅଧିକ ଯାଞ୍ଚ କରିବ ଏସଟିଏଫ।

ଗିରଫ ହୋଇଥିବା 3 ଜଣ ହେଲେ ଏସକେ ଅଜବାର, ଏସକେ ଆଜାଦ, ରମାକାନ୍ତ ସାହୁ । ଏହି ତିନି ଜଣଙ୍କ ଠାରୁ 130 ଗ୍ରାମ 35 ଲକ୍ଷ ଟଙ୍କାର ର ବ୍ରାଉନ ସୁଗାର ଜବତ କରିବା ସହ ଗୋଟିଏ ବନ୍ଧୁକ ଓ ଦୁଇ ରାଉଣ୍ଡ ଗୁଳି ଓ ଏକ କାର କୁ ଜବତ କରିଛି ଏସଟିଏଫ। ନିଶା କାରବାରଠାରୁ ଆରମ୍ଭ କରି ଚୋରା ପଥରଖାଦାନ ପର୍ଯ୍ୟନ୍ତ ସବୁଥିରେ ସାମିଲ ଗ୍ୟାଙ୍ଗଷ୍ଟାର ଛୋଟା । ତେବେ ଏତେ ସବୁ ବେଆଇନ କାରବାର ଛୋଟା କାହା ବଳରେ କରୁଛି ଓ ଜିଲ୍ଲାର ନିଶା ବେପାରୀଙ୍କୁ ହାତ କରି କିପରି ନିଶା କାରବାର କରୁଛି ସବୁର ପର୍ଦ୍ଦାଫାସ କରିବ ସ୍ପେଶାଲ ଟାସ୍କ ଫୋର୍ସ ।

ଭୁବେନଶ୍ବରରୁ ବିକାଶ କୁମାର ଦାସ, ଇଟିଭି ଭାରତ