ଭୁବନେଶ୍ବର:ରାଜ୍ୟରେ ବାଲ୍ୟ ବିବାହରେ ନବରଙ୍ଗପୁରରେ ସର୍ବାଧିକ ରହିଥିବା ବେଳେ ସମ୍ବଲପୁରରେ ସର୍ବନିମ୍ନ ରହିଛି । ଏହାକୁ ରୋକିବାକୁ ରାଜ୍ୟ ସରକାରଙ୍କ ପକ୍ଷରୁ ମହିଳା ଓ ଝିଅଙ୍କୁ ସଚେତନ କରିବା ପାଇଁ ଅନେକ ପଦକ୍ଷେପ ନିଆଯାଉଛି । ପଞ୍ଚାୟତ ସ୍ତରରେ ମହିଳା ଓ ଝିଅଙ୍କୁ ସଚେତନ କରାଯାଉଛି।
ରାଜ୍ୟରେ ବାଲ୍ୟବିବାହ ଜନିତ ଅଭିଯୋଗ କମିଛି ହେଲେ ସମ୍ପୂର୍ଣ୍ଣ ବନ୍ଦ ହୋଇପାରିନାହିଁ । କୋରୋନା ମହାମାରୀ କାରଣରୁ ଅନେକ ପରିବାରର ଆର୍ଥିକ ସ୍ଥିତି ବିଗିଡ଼ିଛି । ଏହି ପରିସ୍ଥିତିରେ ନିମ୍ନ ମଧ୍ୟବିତ୍ତ ଶ୍ରେଣୀର ଲୋକମାନେ ପିଲାଙ୍କୁ ଶିକ୍ଷାଦାନ କରାଇବା ପରିବର୍ତ୍ତେ ବୟସ ପୂର୍ବରୁ ବିବାହ କରି ଦେଉଛନ୍ତି। ଯାହାଦ୍ବାରା ରାଜ୍ୟରେ ବାଲ୍ୟବିବାହ ହାର 20.5 ପ୍ରତିଶତ ରହିଛି । ଏହା ନବରଙ୍ଗପୁର ଜିଲ୍ଲାରେ ସର୍ବାଧିକ 39.4% ରହିଥିବା ବେଳେ ସମ୍ବଲପୁରରେ ସର୍ବନିମ୍ନ 7.4% ରହିଥିବା ଜାତୀୟ ପରିବାର ଓ ସ୍ଵାସ୍ଥ୍ୟ ସର୍ବେକ୍ଷଣ ରିପୋର୍ଟରୁ ଜଣାପଡ଼ିଛି ।
ସେହିପରି ଭାବରେ ଭଦ୍ରକ, ଜଗତସିଂହପୁର, ଯାଜପୁର ଓ ପୁରୀ ଜିଲ୍ଲା ରେ ପୂର୍ବାପେକ୍ଷା ଅଧିକ ବାଲ୍ୟ ବିବାହ ହେଉଥିବା ଜଣାପଡ଼ିଛି । ପୂର୍ବରୁ ଭଦ୍ରକ ଜିଲ୍ଲାରେ ବାଲ୍ୟ ବିବାହ ହାର 9.9 % ଥିବାବେଳେ ଏହା ବୃଦ୍ଧି ପାଇ 10.4%ରେ ପହଞ୍ଚିଛି । ସେହିଭଳି ଜଗତସିଂହପୁର ଜିଲ୍ଲାରେ 9.7%ରୁ 12%, ଯାଜପୁରରେ 8.1 % ରୁ 11.4 % ଓ ପୁରୀରେ 8.3 %ରୁ 10.1 ପ୍ରତିଶତକୁ ବୃଦ୍ଧି ପାଇଛି । ଅନ୍ୟପଟେ ଜାତୀୟ ପରିବାର ଓ ସ୍ଵାସ୍ଥ୍ୟ ସର୍ଭେ ରିପୋର୍ଟ ଅନୁସାରେ 15 ରୁ 19 ବର୍ଷ ବୟସର କିଶୋରୀମାନଙ୍କ ଠାରେ ଏହି ମାତୃତ୍ଵ ହାର ସର୍ବାଧିକ ରହିଛି।