ଭୁବନେଶ୍ବର: 15ରୁ ଆରମ୍ଭ ହେବ ଦ୍ଵିତୀୟ ପର୍ଯ୍ୟାୟ ଲାକଡାଉନ। ତେବେ ଏହି ସମୟରେ କିଛି ନିୟମରେ ସାମାନ୍ୟ ପରିବର୍ତ୍ତନ କରାଯାଇଛି । ଏନେଇ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ସ୍ବତନ୍ତ୍ର ରିଲିଫ କମିଶନର ପ୍ରଦୀପ ଜେନା।
ଦ୍ବିତୀୟ ପର୍ଯ୍ୟାୟ ଲକ୍ଡାଉନ୍: ଜାଣନ୍ତୁ କଣ ହେବ କୋହଳ... କୃଷି ଓ ଆନୁଷଙ୍ଗିକ କାର୍ଯ୍ୟକ୍ରମ ଉପରେ କିଛି କୋହଳ କରାଯାଇଛି । ଏହି ସମୟରେ ସବୁ ପ୍ରକାର ଚାଷ କାର୍ଯ୍ୟ କରିହେବା ସହ କୃଷି ଉପକରଣ ତଥା ମରାମତି ଦୋକାନ, ସାର ଦୋକାନ ଆଦି ଖୋଲା ରହିବ । ଶୀତଳ ଭଣ୍ଡାର ଖୋଲା ରହିବ, ଗୋଦାମ ଗୃହ ମଧ୍ୟ ଖୋଲା ରହିବ । କୃଷି ଋଣ ଆବେଦନ ପାଇଁ ବ୍ୟାଙ୍କ ଖୋଲା ରହିବ । ଏହାସହ ରବି ଧାନ ଫସଲ ପରେ ସମସ୍ତ ମଣ୍ଡି ଖୋଲା ରହିବ ଏବଂ ମଣ୍ଡିରୁ ମିଲ୍ ପର୍ଯ୍ୟନ୍ତ ଧାନ ନେବାରେ କୌଣସି କଟକଣା ରହିବ ନାହିଁ ବୋଲି କୁହାଯାଇଛି ।
ସେହିପରି ମାଛଚାଷ ପାଇଁ ଦ୍ବିତୀୟ ପର୍ଯ୍ୟାୟ ଲକ୍ଡାଉନ୍ରେ କୌଣସି କଟକଣା ନାହିଁ । ମାଛଧରା ବନ୍ଦର ଓ ମାଛ ଜାଲ ତିଆରି କାରଖାନା ବନ୍ଦ ହେବ ନାହିଁ । ଏହା ସହିତ ମାଂସ, ଅଣ୍ଡା ଓ ଦୁଗ୍ଧ ପରିବହନ ପାଇଁ କୌଣସି କଟକଣା ନଥିବାବେଳେ ରାଜ୍ୟର ଗୋଶାଳଗୁଡିକ ମଧ୍ୟ କାର୍ଯ୍ୟକ୍ଷମ ହେବ ବୋଲି ସେ ସୂଚନା ଦେଇଛନ୍ତି ।
ଅନ୍ୟପଟେ ରାଜ୍ୟରେ ଏହି ସମୟରେ ନରେଗା, ପ୍ରଧାନମନ୍ତ୍ରୀ ଆବାସ ଯୋଜନା, ବିଜୁ ପକ୍କା ଘର ଓ ପାଇଖାନା ନିର୍ମାଣ ସହ ପାଇପ୍ ଜଳ ଯୋଗାଣ କାମ ଜାରି ରହିବ ବୋଲି ସେ କହିଛନ୍ତି । ଅନ୍ୟପକ୍ଷରେ ରାଜ୍ୟରେ ରେଷ୍ଟୁରାଣ୍ଟ ଓ ଢାବା ଖୋଲା ରହିବାକୁ ଥିବାବେଳେ ସେଠାରେ କେହି ଖାଇପାରିବେ ନାହିଁ ବୋଲି କୁହାଯାଇଛି । କେବଳ ସେଠାରୁ ଖାଦ୍ୟ ସାମଗ୍ରୀ ନେଇ ଆସିବେ ବୋଲି ସୂଚନା ଦେଇଛନ୍ତି ସେ । ସେହିପରି ଇକର୍ମସ ଓ ଅନଲାଇନରେ ସବୁ ପ୍ରକାର ସାମଗ୍ରୀ ମଗାଇ ପାରିବେ ବୋଲି ସେ କହିଛନ୍ତି ।
ସେପଟେ କେନ୍ଦୁପତ୍ରର ସମସ୍ତ ପ୍ରକାର କାର୍ଯ୍ୟ କରିହେବ । ସେହିପରି ବନୀକରଣ, ବୃକ୍ଷରୋପଣ ଆଦି କାର୍ଯ୍ୟ ଏହି ସମୟରେ କରିହେବ । ତେବେ ଏସବୁ କାର୍ଯ୍ୟ ସାମାଜିକ ଦୂରତା ବଜାୟ ରଖି କରିହେବ ବୋଲି ସେ କହିଥିବାବେଳେ ଏସବୁ କଣ୍ଟେନ୍ମେଣ୍ଟ ଜୋନ୍ରେ କରାଯାଇ ପାରିବ ନାହିଁ ବୋଲି କହିଛନ୍ତି ।
ଏହାସହ ପ୍ରଥମ ପର୍ଯ୍ୟାୟ ଲାକଡାଉନ ସଫଳ ହୋଇଛି। ଓଡିଶାରେ ଭଲ ପ୍ରଭାବ ପଡିଛି। ଏହାକୁ ଦେଖି ଅବଧି ବଢାଇଛନ୍ତି ସରକାର। ତେଣୁ ସମସ୍ତେ ସଚେତନ ରହି ସତର୍କ ରୁହନ୍ତୁ ବୋଲି ସେ ଅପିଲ କରିଛନ୍ତି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
