ବାତ୍ୟା ବିପନ୍ନଙ୍କ ଦୁଃଖ ବୁଝୁଛି ସାମାଜିକ ଅନୁଷ୍ଠାନ

ବାତ୍ୟା 'ଫନି'କୁ ଇତି ମଧ୍ୟରେ ବିତିଲାଣି ଏକ ସପ୍ତାହରୁ ଊର୍ଦ୍ଧ୍ବ ସମୟ । ବହୁ ବିପନ୍ନ ଏବେବି ଖୋଲା ଆକାଶ ତଳେ । ସରକାରୀ ସ୍ତରରେ ହେଉ କିମ୍ବା ବେସରକାରୀ ସ୍ତରରେ, ସବୁଆଡ଼ୁ ସହାୟତାର ସୁଅ ଛୁଟୁଛି । ତେବେ ବାତ୍ୟାରେ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଥିବା ପୁରୀ ଜିଲ୍ଲାର ନିମାପଡ଼ା ଅଞ୍ଚଳରେ ଏବେ ଏକ ସାମାଜିକ ଅନୁଷ୍ଠାନ 'ଉତ୍କଳ ବାତ୍ୟା ବିପନ୍ନ ସମିତି' ବିପନ୍ନଙ୍କୁ ସାହାଯ୍ୟ ଯୋଗାଇ ଦେଉଛି ।

ଭୁବନେଶ୍ବର: ବାତ୍ୟା 'ଫନି'କୁ ଯିବାର 12 ଦିନ ବିତିଲାଣି । ଫନି ମାଡରେ ଘାଇଲା ହୋଇଛି ସମ୍ପୂର୍ଣ୍ଣ ପୁରୀ ସହର ଏବେ ବି ସଳଖି ଛିଡା ହୋଇ ପାରିନି । ଯେଉଁଥିରେ ପୁରୀ ଜିଲ୍ଲା ନିମାପଡା ବ୍ଲକ ଅଧିକ ପ୍ରଭାବିତ ହୋଇଛି । ସବୁକିଛି ଧ୍ବସ୍ତବିଧ୍ବସ୍ତ ହେବା ସହ ଲୋକେ ନାହି ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏସବୁ ଭିତରେ ପ୍ରଶାସନ ପକ୍ଷରୁ ଖୁବଶୀଘ୍ର ସ୍ବାଭାବିକ ହେବାକୁ ଆଶ୍ବସନା ଦିଆଯାଉ ଥିବାବେଳେ ବାତ୍ୟା ବିପନ୍ନଙ୍କ ଦୁଃଖ ବୁଝିଛି 'ଉତ୍କଳ ବାତ୍ୟା ବିପନ୍ନ ସମିତି' ନାମକ ସାମାଜିକ ଅନୁଷ୍ଠାନ ।

ଏହି ଅନୁଷ୍ଠାନ ବାତ୍ୟା ବିପନ୍ନଙ୍କ ପାଖରେ ପହଞ୍ଚିଛନ୍ତି । ଫନି ପରେ ଅତି ଜରୁରୀ ହୋଇପଡିଥିବା ପାନୀୟଜଳ ଓ ଔଷଧ ପତ୍ର ଯୋଗାଇ ଦେଉଛି ଏହି ଅନୁଷ୍ଠାନ । ଅନ୍ୟପଟେ ମଶାଙ୍କ ପ୍ରାଦୁର୍ଭାବ ବଢିବା ସହ ପାଣିର ସଂକ୍ରମଣ ଯୋଗୁଁ ଲୋକଙ୍କୁ ଛାନିଆ କରିଛି ମହାମାରୀ ଭୟ । ଏଥିପାଇଁ ଅନୁଷ୍ଠାନ ତରଫରୁ ଆରଏସଏସ ସହାୟତାରେ ବଣ୍ଟା ଯାଉଛି ଔଷଧ ।

ଏହାସହ ପାନୀୟ ଜଳ ସହ ଶୁଖିଲା ଖାଦ୍ୟ ଚୁଡା ବାଣ୍ଟିଛନ୍ତି ଅନୁଷ୍ଠାନର ସଦସ୍ୟ । ନିମାପଡା ବ୍ଲକର ଧନୁଆ, ବିଅଁଳ ପଡୋଶୀ ପଞ୍ଚାୟତ ଅତି କ୍ଷତିଗ୍ରସ୍ତ ହୋଇଥିବା ବାତ୍ୟାବିପନ୍ନଙ୍କୁ ଏହି ସହାୟତା ଯୋଗାଇ ଦିଆଯାଇଛି । ଏଥିସହିତ ଯିଏ ସରକାରୀ ରିଲିଫ ପାଇଥିଲେ ବି ରୋଷେଇ କରି ଖାଇବା ପାଇଁ ଅସମର୍ଥ ସେମାନଙ୍କୁ ରନ୍ଧାଖାଦ୍ୟ ବଣ୍ଟା ଯାଇଛି ।

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ