ଭୁବନେଶ୍ବର: ରାଜଧାନୀରେ ଭିନ୍ନ ଢଙ୍ଗରେ ବିକ୍ଷୋଭ ପ୍ରଦର୍ଶନ କରିଛି ସ୍ମାର୍ଟସିଟି ଅନଲାଇନ ଅଟୋଗ୍ରୁପ । କୋରୋନା ମହାମାରୀ ସମୟରେ ପ୍ରାଇଭେଟ ଫାଇନାନ୍ସ କମ୍ପାନୀ ମାନଙ୍କ ଦାଦାଗିରି ବିରୋଧରେ ଗାନ୍ଧୀ ମାର୍ଗରେ ଗର୍ଜିଛନ୍ତି ସ୍ମାର୍ଟସିଟି ଅନଲାଇନ ଅଟୋଗ୍ରୁପର କର୍ମୀମାନେ । ମହାମାରୀ ସମୟରେ ବ୍ୟବସାୟ ବନ୍ଦ ରହିଥିବା ବେଳେ ଚାଳକ ମାନଙ୍କ ପାଇଁ ଦିନକୁ ଦୁଇ ମୁଠା ଖାଦ୍ୟ ଖାଇବା ଅସମ୍ଭବ ହୋଇପଡିଛି ।
ରାଜରାସ୍ତାରେ ଭିକ୍ଷାମାଗି ଅଭିନବ ଢଙ୍ଗରେ ବିକ୍ଷୋଭ କରିଛି ସ୍ମାର୍ଟ ସିଟି ଅନଲାଇନ ଅଟୋଗ୍ରୁପ
କୋଭିଡ ସମୟରେ ଦୀର୍ଘ ୬ ମାସ ଧରି କୌଣସି ପ୍ରକାର ସୁଧ ଆଦାୟ କରାଯିବନି ବୋଲି ସରକାର ଘୋଷଣା କରିଥିବା ବେଳେ ସରକାରଙ୍କ ଗାଇଡଲାଇନ ମାନୁନାହାନ୍ତି ଘରୋଇ ଫାଇନାନ୍ସ କମ୍ପାନୀ । ଏନେଇ ଦାଦାଗିରି ସହ କିସ୍ତିନେବା ପାଇଁ ଅଟୋଚାଳକଙ୍କ ଉପରେ ମାତ୍ରାଧିକ ଶୋଷଣ ସହ ଅକଥନୀୟ ଅତ୍ୟାଚାର କରୁଛନ୍ତି । ସେପଟେ କାହାର ଗାଡି ଭିଡ଼ିନେଉଛନ୍ତି ତ କାହାକୁ ଏକୁଟିଆ ଦେଖି ଧମକ ଦେଉଛନ୍ତି । ଆଉ ମନଇଛା ଚକ୍ରବର୍ତୀ ସୁଦ୍ଧ ଲାଗୁ କରି ବକେୟା ପାଉଣା ଏକକାଳୀନ ମାଗୁଛନ୍ତି ।