ଭୁବନେଶ୍ବର: କୋରୋନା ମହାମାରୀ ଭଳି ଘଡ଼ିସନ୍ଧି ମୂହୂର୍ତ୍ତ ଦେଇ ସମସ୍ତେ ଗତି କରୁଛନ୍ତି । ପ୍ରାୟ ଦେଢ଼ ବର୍ଷ ହେଲାଣି ଶିକ୍ଷାକ୍ଷେତ୍ର ଗୁରୁତର ଭାବେ କୋରୋନାରେ ପ୍ରଭାବିତ ହୋଇଛି । ସ୍କୁଲ ଠାରୁ କଲେଜ ପର୍ଯ୍ୟନ୍ତ ସବୁଆଡ଼େ ଅନଲାଇନ ପାଠ ପଢ଼ା ଚାଲିଛି । ଟିକେ ପଇସାବାଲାଙ୍କ ପିଲା ସିନା ଅନଲାଇନ ପାଠପଢାରୁ ଉପକୃତ ହେଉଛନ୍ତି, ହେଲେ ଏଥିରୁ ପଛରେ ପଡିଛନ୍ତି ବସ୍ତି ପିଲା । ବସ୍ତିମାନଙ୍କରେ ଅନଲାଇନ ସୁବିଧା ନଥିବାରୁ ପିଲା ପାଠ ପଢିପାରୁନାହାନ୍ତି । ଏଭଳି ସମୟରେ ସେମାନଙ୍କୁ ପଢାଇବା ପାଇଁ ଆଗେଇ ଆସିଛନ୍ତି ଶକୁ ଦିଦି । ପାଠପଢ଼ା ସାଙ୍ଗକୁ ସେ କୋରୋନା ସଚେତନ ମଧ୍ୟ କରାଉଛନ୍ତି । ଗୋଟିଏ କି ଦୁଇଟି ସାହିରେ ନୁହେଁ ୮ ଟି ସାହିରେ ବୁଲି ବୁଲି ପାଠ ପଢ଼ାଉଛନ୍ତି ଶକୁ । ତାଙ୍କର ଏହି ମହତ୍ କାର୍ଯ୍ୟ ପାଇଁ ସମସ୍ତେ ତାଙ୍କୁ ବାଃ ବାଃ କରୁଛନ୍ତି ।
ଭୁବନେଶ୍ବର ସାଲିଆ ସାହିର ୨୪ ବର୍ଷୀୟ ଯୁବତୀ ଶକୁନ୍ତଳା ନାୟକ । ଦୀର୍ଘ ଦିନ ହେବ ସ୍କୁଲ ଟିଉସନ ବନ୍ଦ ଥିବାରୁ ବସ୍ତି ପିଲାଙ୍କୁ ମାଗଣାରେ ଶିକ୍ଷାଦାନ ଦେଉଛନ୍ତି ସେ । 2019 ମସିହାରେ ଗ୍ରାଜୁଏସନ ସାରିବା ପରେ ବିଇଏଡ ଏବଂ ସିଟି ପାଇଁ ନିଜ ପ୍ରସ୍ତୁତ ହେବା ସହ ଦିନକୁ 3 ରୁ 4ଟି ବସ୍ତିକୁ ଯାଇ ପାଠ ପଢାଉଛନ୍ତି । ସାଲିଆ ସାହିର ମେ ଫାୟାର ବସ୍ତି, ବାଜପେୟୀ ନଗର, ମଙ୍ଗଳା ନଗର, ତାରିଣୀ ବସ୍ତି, ବିଷ୍ରା ବସ୍ତି, ଇଡକୋ ସାହି ଏବଂ ପ୍ରଧାନ ବସ୍ତିର ପିଲାମାନେ ପଢୁଛନ୍ତି ଶକୁନ୍ତଳାଙ୍କ ପାଖରେ । କେବଳ ପାଠ ପଢା ନୁହେଁ, ଚିତ୍ର ଅଙ୍କନ ଭଳି ସେ ବିଭିନ୍ନ କୌଶଳ ଶିକ୍ଷା ମଧ୍ୟ ଦେଉଛନ୍ତି । କୌଣସି ପିଲା ଯେପରି ଅର୍ଥଭାବରୁ ପାଠ ନ ଛାଡିବେ ସେଥିପାଇଁ ସେ ମାଗଣାରେ ଶିକ୍ଷାଦାନ କରୁଛନ୍ତି ।