ଭୁବନେଶ୍ବର: କଟକ-ଭୁବନେଶ୍ବର ରାସ୍ତାର ଓଭର ବ୍ରିଜରେ ରହିବ ରୋଡ଼ ବ୍ୟାରିଅର । ଭୁବନେଶ୍ବର ଦେଇ ଯାଇଥିବା ଜାତୀୟ ରାଜପଥ ଓଭର ବ୍ରିଜରେ ଦୁର୍ଘଟଣା ରୋକିବାକୁ କମିଶନରେଟ ପୋଲିସ ପକ୍ଷରୁ କଟକଣା ଜାରି କରିବ। ମାତ୍ରାଧିକ ବେଗ ରୋକିବାକୁ ରାସ୍ତାକଡ଼ରେ ଲାଗିବ ଇଣ୍ଟରସେପ୍ଟର । ଭୁବନେଶ୍ବର କଟକ ଓଭରବ୍ରିଜରେ ରହିବ ରୋଡ ବ୍ୟାରିଅର । ଏହାକୁ ନେଇ କମିଶନରେଟ ପୋଲିସ ପକ୍ଷରୁ ଆରଟିଓଙ୍କ ସହ ବୈଠକ କରିଛନ୍ତି ।
ଭିଡିଓ ସୌଜନ୍ୟ : ସମ୍ବାଦଦାତା, ଭୁବନେଶ୍ବର ରସୁଲଗଡ଼ ଠାରୁ ଆରମ୍ଭ କରି ଖଣ୍ଡଗିରି ଯାଏଁ ପ୍ରତ୍ୟେକ ଦିନ ଦୁର୍ଘଟଣା ଘଟୁଛି । ଏହି ଦୁର୍ଘଟଣାକୁ ରୋକିବା ପାଇଁ ଟ୍ରାଫିକ ଡିସିପି ଏବଂ ଟ୍ରାଫିକ ଏସପିଙ୍କ ସହ ଆଲୋଚନା କରିଛନ୍ତି ପୋଲିସ କମିଶନର । ରାଜଧାନୀ ରାସ୍ତାରେ ବାଇକ୍ ଆରୋହୀମାନେ ଦ୍ରୁତ ଗତିରେ ଗାଡି ଚଳାଉଛନ୍ତି । ଟିକେ ଅନ୍ୟମନସ୍କ ହେଲେ ଜୀବନ ଯାଉଛି । ଏମିତି ସପ୍ତାହ ମଧ୍ୟରେ 5 ଜଣଙ୍କର ଜୀବନ ଗଲାଣି।
ବାରମ୍ବାର ଦୁର୍ଘଟଣା ଘଟିଥିବା ବେଳେ ନିଦ ହଜାଇଦେଉଛି କମିଶନରେଟ ପୋଲିସର । ମେ 25 ତାରିଖ ଶନିବାର ଅପରହ୍ନ 2ଟା ସମୟରେ ଜାତୀୟ ରାଜପଥ ବରମୁଣ୍ଡା ଫାୟାର ଷ୍ଟେସନ ଓଭାର ବ୍ରିଜ ଉପରେ ଏକ ସଡ଼କ ଦୁର୍ଘଟଣାରେ 2 ଜଣ ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଥିଲ।
ଏପରିକି ଅଧିକ ଦ୍ରୁତ ଗତିରେ ସ୍କୁଟି ଚଳାଉଥିବା ବେଳେ ଭାରସାମ୍ୟ ହରାଇ ମୃତ୍ୟୁ ମୁଖରେ ପଡ଼ିଥିଲେ । ଏପରିକି ଶୁକ୍ରବାର ରାତିରେ ନୟାପଲ୍ଲୀ ଓଭରବ୍ରିଜ ଉପରେ ଏକ ବାଉଁଶ ବୋଝେଇ ଟ୍ରକ୍ ଧକ୍କାରେ ଜଣେ ବାଇକ ଆରୋହୀଙ୍କ ସହ ଧକ୍କା ହେବା ଫଳରେ ବାଇକ ଆରୋହୀଙ୍କର ମୃତ୍ୟୁ ଘଟିଥିଲା।
କଟକ ଓ ଭୁବନେଶ୍ବରର ବିଭିନ୍ନ ସ୍ଥାନରେ ରହିଥିବା ବ୍ଲାକ ସ୍ପଟକୁ ଚିହ୍ନଟ କରିବା ପାଇଁ ଆସନ୍ତା 31 ତାରିଖ ସୁଦ୍ଧା ଦାଖଲ କରିବା ପାଇଁ ଉଭୟ ଡିସିପିଙ୍କୁ ନିର୍ଦ୍ଦେଶ ଦେଇଛନ୍ତି ପୋଲିସ କମିଶନର । ଏହାଛଡା ଉଭୟ ଆରଟିଓଙ୍କ ସହ ଆଲୋଚନା କରି ଜାତୀୟ ରାଜପଥକୁ କିଭଳି ଦୁର୍ଘଟଣାକୁ ରୋକା ଯାଇପାରିବ ସେଥିପ୍ରତି ନଜର ରହିବ ବୋଲି କମିଶନର ସତ୍ୟଜିତ ମହାନ୍ତି ସୂଚନା ଦେଇଛନ୍ତି।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
