'ନବୀନ ପଟ୍ଟନାୟକ କେବଳ ଭାରତ ନୁହେଁ, ସମଗ୍ର ବିଶ୍ବରେ ପ୍ରଥମ'

ବିଜୁ ପଟ୍ଟନାୟକଙ୍କୁ ଭାରତ ରତ୍ନ ପାଇଁ ହେଉଥିବା ଦାବି ନେଇ କହିଛନ୍ତି ଯେ ଭାରତ ରତ୍ନ ଏବେ ତାଙ୍କ ପାଇଁ ଛୋଟ ହୋଇଯାଇଛି । ଯେମିତି ମହାତ୍ମାଗାନ୍ଧୀଙ୍କ ନିକଟରେ ନୋବେଲ ଶାନ୍ତି ପୁରସ୍କାର ଛୋଟ ହୋଇଯାଇଛି ସେହିପରି ବିଜୁଙ୍କ ପାଇଁ ଭାରତ ରତ୍ନ ।

ଭୁବନେଶ୍ବର: ନବୀନ ପଟ୍ଟନାୟକ କେବଳ ଭାରତ ବର୍ଷରେ ପ୍ରଥମ ହୋଇନାହାନ୍ତି । ସାରା ବିଶ୍ବରେ ସେ ଓଡିଶାର ଟେକ ରଖିଛନ୍ତି । ଏକ ନମ୍ବର ମୁଖ୍ୟମନ୍ତ୍ରୀ ଭାବେ ନବୀନ ସାରା ବିଶ୍ବରେ ଖ୍ୟାତ ବୋଲି ବିଜେଡି ସାଂସଦ ପ୍ରସନ୍ନ ପାଟ୍ଟଶାଣୀ କହିଛନ୍ତି ।

ଆଜି ବିଜୁ ପଟ୍ଟନାୟକଙ୍କ 103 ତମ ଜୟନ୍ତୀ ଅବସରରେ ପ୍ରସନ୍ନ ବିଜୁ ପଟ୍ଟନାୟକ ପାର୍କରେ ବିଜୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଏହି କଥା କହିଛନ୍ତି । ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ସେ କହିଛନ୍ତି ଯେ ନବୀନ ପଟ୍ଟନାୟକ ଅନେକ ଭଲ କାମ କରିଛନ୍ତି । ଅତୀତରେ ଯାହା କେହି କରିନଥିଲେ ତାହା ସେ କରି ଦେଖାଇଛନ୍ତି । ନୂଆ ନୂଆ ଯୋଜନା ଓ ପ୍ରକଳ୍ପ ଦ୍ବାରା ସେ ଓଡିଶାର ଲୋକଙ୍କ ପ୍ରିୟପାତ୍ର ହୋଇଛନ୍ତି ବୋଲି ସେ କହିଛନ୍ତି ।

ପାଟ୍ଟଶାଣୀ ଆହୁରି ମଧ୍ୟ କହିଛନ୍ତି ଯେ ଏବର୍ଷ କର୍ମୀଙ୍କ ମଧ୍ୟରେ ରହିଛି ଅନେକ ଉଲ୍ଲାସ । କାରଣ ଏଥର ବିଜୁ ପଟ୍ଟନାୟକଙ୍କ ଆଦର୍ଶରେ ଆମେ ପୁଣି ସରକାରକୁ ଆସିବୁ । ବିଜୁ ପଟ୍ଟନାୟକଙ୍କ ପରେ କେବଳ ନବୀନ ପଟ୍ଟନାୟକ ହିଁ ଏପରି କାମ କରୁଛନ୍ତି ଯାହା କେହି ଅତୀତରେ କରିନଥିଲେ । ବାପାଙ୍କ ଆଶୀର୍ବାଦରେ ନବୀନ ଚତ୍ମକାର କାର୍ଯ୍ୟ କରୁଛନ୍ତି ବୋଲି ପ୍ରସନ୍ନ କହିଛନ୍ତି ।

ଏହାସହ ବିଜୁ ପଟ୍ଟନାୟକଙ୍କୁ ଝଡର ଇଗଲ ବୋଲି ସେ କହିବା ସହ ଓଡିଶା କେବଳ ଦୁଇ ଜଣ ନେତାଙ୍କୁ ଜନ୍ମ ଦେଇଥିଲା ବୋଲି କହିଛନ୍ତି । ଜଣେ ନେତାଜୀ ସୁଭାଷ ଚନ୍ଦ୍ର ବୋଷ ଏବଂ ଆଉ ଜଣେ ବିଜୁ ପଟ୍ଟନାୟକ । ଜଣେ ଏଠାରେ ଜନ୍ମ ନେଇଥିଲେ କିନ୍ତୁ କର୍ମ କରିପାରିନଥିଲେ । ହେଲେ ଆଉ ଜଣେ ଏଠାରେ ଜନ୍ମ ନେଇ, କର୍ମ କରି, ସଂଗ୍ରାମ କରି ଓଡିଶାକୁ ବିଶ୍ବବନ୍ଦିତ କରିଛନ୍ତି ବୋଲି ପାଟ୍ଟଶାଣୀ କହିଛନ୍ତି ।

ବିଜୁ ପଟ୍ଟନାୟକଙ୍କୁ ଭାରତ ରତ୍ନ ପାଇଁ ହେଉଥିବା ଦାବି ନେଇ କହିଛନ୍ତି ଯେ ଭାରତ ରତ୍ନ ଏବେ ତାଙ୍କ ପାଇଁ ଛୋଟ ହୋଇଯାଇଛି । ଯେମିତି ମହାତ୍ମାଗାନ୍ଧୀଙ୍କ ନିକଟରେ ନୋବେଲ ଶାନ୍ତି ପୁରସ୍କାର ଛୋଟ ହୋଇଯାଇଛି ସେହିପରି ବିଜୁଙ୍କ ପାଇଁ ଭାରତ ରତ୍ନ । ତେବେ ତାଙ୍କ ଜୀବିତ ଅବସ୍ଥାରେ ଏହା ତାଙ୍କୁ ପ୍ରଦାନ କରାଯାଇଥିଲେ ଓଡିଆ ଜାତି ପ୍ରତି ଏହା ଶ୍ରେଷ୍ଠ ସମ୍ମାନ ହୋଇଥାନ୍ତା ବୋଲି ପଟ୍ଟଶାଣୀ କହିଛନ୍ତି ।

ବ୍ୟୁରୋ ଇନପୁଟ, ଇଟିଭି ଭାରତ