ଭୁବନେଶ୍ବର: ନୟାଗଡ ଯଦୁପୁର ନାବାଳିକା ହତ୍ୟାକାଣ୍ଡ ମାମଲାରେ ତଦନ୍ତ କରୁଥିବା ଏସଆଇଟି ମୁଖ୍ୟ ଅରୁଣ ବୋଥ୍ରାଙ୍କ ଉପରେ ଜୋରଦାର ବର୍ଷିଲେ ବିରୋଧୀ ଦଳ ନେତା ପ୍ରଦୀପ୍ତ ନାୟକ । ସେ ଏସଆଇଟି ଏବଂ ରାଜ୍ୟ ସରକାରଙ୍କ ଉପରେ ଟ୍ବିଟ କରିଛନ୍ତି ଯେ, କାହିଁକି ଏସଆଇଟି ଜଣେ ନାବାଳକ ପିଲାକୁ ଜୋର ଜବରଦସ୍ତି ସାବାଳକ ଦର୍ଶାଇବାକୁ ପ୍ରୟାସ କରୁଥିଲେ ଏହା ଏକ ବଡ ପ୍ରଶ୍ନ ।
ଏସଆଇଟିଙ୍କୁ ପ୍ରଦୀପ୍ତଙ୍କ ଟାର୍ଗେଟ ସେ ତାଙ୍କର ଅଫିସିଆଲ୍ ଟ୍ବିଟରରେ ଲେଖିଛନ୍ତି ଯେ ,ପରୀ ହତ୍ୟା ମାମଲାରେ ପୋକ୍ସ କୋର୍ଟ ସରୋଜ ସେଠୀଙ୍କୁ ନାବାଳକ ବୋଲି ଘୋଷଣା କରିବା ପରେ ଏବେ ଏହି ଘଟଣାର ତଦନ୍ତ କରୁଥିବା ଏସଆଇଟିର ଅସଲ ଉଦ୍ଦେଶ୍ୟ ଓ ପାରିବା ପଣିଆକୁ ନେଇ ପ୍ରଶ୍ନ ଉଠୁଛି । ଏହାସହ ମାଟ୍ରିକ ପାସର ପ୍ରମାଣପତ୍ରରେ ଜନ୍ମ ତାରିଖ ଥିବା ସତ୍ତ୍ବେ କେଉଁ ଅଦଦ୍ଭୁତ କାରଣ ପାଇଁ ପୋଲିସ ତାଙ୍କୁ ସାବାଳକ ଦେଖାଉଥିଲେ । ସାରା ଭାରତରେ ଏପରି ହେବା ବୋଧେ ବିରଳ । ଏହା ବେଆଇନ ଓ ଅରୁଣ ବୋଥ୍ରାଙ୍କ ବିରୁଦ୍ଧରେ ଫୌଜଦାରି ମାମଲା ରୁଜୁ ହେବା ଦରକାର ବୋଲି ଦାବି କରିଛନ୍ତି ପ୍ରଦୀପ୍ତ । ।
ହାଡ ଓସିଫିକେସନ ପରୀକ୍ଷା କରିବା ପାଇଁ ବୋଥ୍ରା ବାବୁଙ୍କୁ କିଏ ଅନୁମତି ଦେଇଥିଲା ? ବୋଲି ସେ ପ୍ରଶ୍ନ କରିଛନ୍ତି। ମନ୍ତ୍ରୀ ଅରୁଣ ସାହୁ ଓ ବିଜେଡି ଦଳକୁ ରକ୍ଷା କରିବା ପାଇଁ ସରକାର ଠୋସ ପ୍ରମାଣ ବିନା ଜଣେ ଦଳିତ ନାବାଳକ ପିଲାକୁ ଫସାଇ ଦେଇଥିବା ଭଳି ଅନୁଭବ ହେଉଛି । କାରଣ ଏବେବି ଅଦାଲତ ଗ୍ରହଣ କରିପାରିବା ଭଳି ଗୋଟିଏ ବି ପ୍ରମାଣ ଏସଆଇଟି ପାଖରେ ନାହିଁ ।ଅଙ୍ଗ ତସ୍କରିକୁ ଲୁଚାଇବା ପାଇଁ ମନଗଢା କାହାଣୀ କହୁଛି ଏସଆଇଟି । ଗୁଗଲ ହିଷ୍ଟ୍ରି ଡିଲିଟ ରିପୋର୍ଟ ଏସଆଇଟି ପାଖେ ନାହିଁ । ନଡିଆ ବାହୁଙ୍ଗାର ଡିଏନଏ ଟେଷ୍ଟ ରିପୋର୍ଟ ହସ୍ତଗତ ହୋଇନାହିଁ । ପଲିଗ୍ରାଫି ଟେଷ୍ଟିଂ ନିର୍ବିବାଦୀୟ ନୁହେଁ, ଏପ୍ରସଙ୍ଗରେ ସୁପ୍ରିମକୋର୍ଟଙ୍କର ରାୟ ଅଛି ।
ସରୋଜ ପୂର୍ବରୁ ଅଭିଯୋଗ କରିଥିଲା କି, ଏସଆଇଟିର ମୁଖ୍ୟ ତାକୁ ଦୋଷ ସ୍ବୀକାର କରିବା ପାଇଁ ୫ ଲକ୍ଷ ଟଙ୍କା ଯାଚୁଥିଲେ । ପରୀର ବାପାମା' ଏସଆଇଟିର ତଦନ୍ତକୁ ବିଶ୍ବାସ କରୁନାହାନ୍ତି । ସାଧାରଣ ଲୋକମାନଙ୍କ ଭିତରେ ଏସଆଇଟିର ବିଶ୍ୱସନୀୟତା ଆଉ ନାହିଁ । ତେଣୁ ଘଟଣାର ସଠିକ ତଦନ୍ତ କରିବା ପାଇଁ ଏହି ମାମଲାକୁ ସିବିଆଇକୁ ଦିଆଯାଉ ବୋଲି ସେ ଟ୍ବିଟ କରିଛନ୍ତି।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
