ଜଳନ୍ତା ଜୁଇରୁ ମୁଣ୍ଡ ଖୋଜୁଛି କମିଶନରେଟ ପୋଲିସ

ବାଲିପାଟଣା ଥାନା ବନମାଳିପୁର ଫାଣ୍ଡି ଗଡଚାରିପଦା ମଶାଣି ଭୂଇଁରୁ ପୋଲିସ ତଦନ୍ତ ଆରମ୍ଭ କରିଛି । ଗାଁ ମଶାଣିରେ ଜଳୁଥିବା ଜୁଇକୁ ଲିଭାଇ ମୁଣ୍ଡ ଓ ହାଡ ସଂଗ୍ରହରେ ବ୍ୟସ୍ତ ପୋଲିସ ଅଧିକାରୀ ।

ଭୁବନେଶ୍ବର: ରାଜଧାନୀ ଉପକଣ୍ଠରେ ଚାଞ୍ଚଲ୍ୟ । ଜଳନ୍ତା ଜୁଇରୁ ମୁଣ୍ଡ ଖୋଜୁଛି ପୋଲିସ। ଏମିତି ଘଟଣା ଦେଖିବାକୁ ମିଳିଛି ବାଲିପାଟଣା ଥାନା ବନମାଳିପୁର ଫାଣ୍ଡି ଗଡଚାରିପଦା ମଶାଣି ଭୂଇଁରେ । ଗାଁ ମଶାଣିରେ ଜଳୁଥିବା ଜୁଇକୁ ଲିଭାଇ ମୁଣ୍ଡ ଓ ହାଡ ସଂଗ୍ରହରେ ବ୍ୟସ୍ତ ପୋଲିସ ଅଧିକାରୀ ।

ସୂଚନା ମୁତାବକ ଗାଁର ବାନାମ୍ବର ଭୋଇଙ୍କ ଏକ ମାତ୍ର ୨୨ ବର୍ଷିଆ ଝିଅ ମିଲୁର ମୃତ୍ୟୁକୁ ନେଇ ପୋଲିସ ତଦନ୍ତ ଆରମ୍ଭ କରିଛି । ଝିଅକୁ ହତ୍ୟା କରାଯାଇ ପୋଡା ଯାଇଥିବା ସନ୍ଦେହରେ ଏପରି ତଦନ୍ତ କରିଛନ୍ତି କମିସନରେଟ ପୋଲିସ ଅଧିକାରୀ । ହେଲେ ଅନ୍ୟପଟେ ଝିଅକୁ ରୋଗ ଆକ୍ରାନ୍ତ ଯୋଗୁ ମୃତ୍ୟୁ ହୋଇଥିବା କହିଛନ୍ତି ପରିବାର ଲୋକେ ।

ଅଧରାତିରେ ମୃତ୍ୟୁ ଯୋଗୁଁ ଶିଘ୍ର ଅନ୍ତେକ୍ରିୟା ପାଇଁ ଦାହ କରାଯାଇଥିବା ପରିବାର ଲୋକେ କହିଛନ୍ତି । ତେବେ ଗୋଟିଏ ପଟେ ପରିବାର ଲୋକଙ୍କ ଏପରି ବୟାନ ଅନ୍ୟପଟେ ପୋଲିସର ସନ୍ଦେହ ଯାହା ସାରା ଅଞ୍ଚଳରେ ଚାଞ୍ଚଲ୍ୟ ଖେଳାଇଛି । ଏନେଇ ଫରେନସିକ ରିପୋର୍ଟ ପରେ ଘଟଣା ସ୍ପଷ୍ଟ ହେବ ବୋଲି ସୂଚନା ମିଳିଛି । ତେବେ ଘଟଣା ସ୍ଥଳରୁ ହାଡ ଓ ଖପୁରୀ ଅଂଶ ବିଶେଷ ସଂଗ୍ରହ କରି ପୋଲିସ ତଦନ୍ତ ଜାରି ରଖିଛି ।

ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ