ବ୍ୟାନ ପରେ ବି ବେଧଡ଼କ ବ୍ୟବହାର

ଗାନ୍ଧୀ ଜୟନ୍ତୀରୁ ଅର୍ଥାତ୍ ଆଜିଠାରୁ ସାରା ଦେଶରେ ବ୍ୟାନ ହୋଇଛି ପ୍ଲାଷ୍ଟକ । ରାଜ୍ୟରେ ମଧ୍ୟ କଡ଼ାକଡ଼ି ଭାବେ ସମାନ ନିୟମ ଲାଗୁ ହୋଇଛି । କିନ୍ତୁ ନିୟମ ଜାରିହେବା ସ୍ବତେ ମଧ୍ୟ ରାଜଧାନୀରେ ବେଧଡ଼କ ବ୍ୟବହାର ହେଉଛି ସିଙ୍ଗଲ ୟୁଜ୍ ପ୍ଲାଷ୍ଟିକ ଓ ପଲଥିନ୍ ।

ଭୁବନେଶ୍ବର: ଆଜି ଠାରୁ ସମସ୍ତ ରାଜ୍ୟରେ ପ୍ଲାଷ୍ଟିକ ବ୍ୟବହାର ଉପରେ ଲଗାଯାଇଛି କଟକଣା । ବିଶେଷ କରି ‘ସିଙ୍ଗଲ ୟୁଜ୍ ପ୍ଲାଷ୍ଟିକ’ର ବ୍ୟବହାରକୁ ସମ୍ପୂର୍ଣ୍ଣ ବନ୍ଦକରିବାକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର । ସିଙ୍ଗଲ ୟୁଜ ପ୍ଲାଷ୍ଟିକ ଯେପରି ପ୍ଲାଷ୍ଟିକ ଗ୍ଲାସ, ପଲିଥିନ, ଚାମଚ, ବାଉଲ ଆଦି ବ୍ୟବହାର ଉପରେ ବ୍ୟାନ ଲାଗାଯାଇଛି ।ଏହା ସହ ୨୦୦ ମିମିର ପ୍ଲାଷ୍ଟିକ ପାଣି ବୋତଲ ଉପରେ ମଧ୍ୟ ବ୍ୟାନ କରାଯାଇଛି । ଯଦି କେହି ପ୍ଲାଷ୍ଟିକ ପଲିଥିନ ବ୍ୟବହାର କରୁଥିବାର ନଜର ଆସନ୍ତି ତେବେ ସେମାନଙ୍କ ଠାରୁ ଜୋରିମାନା ଆଦାୟ କରାଯିବା ନେଇ ନିର୍ଦ୍ଦେଶ ମଧ୍ୟ ଜାରି କରାଯାଇଛି ।

ହେଲେ ଏହି ନିୟମ ଜାରି ହେବା ସ୍ଵତେ ମଧ୍ୟ ତାହାର ଟିକିଏ ବି ପ୍ରଭାବ ପଡିନଥିବା ଦେଖିବାକୁ ମିଳିଛି । ଭୁବନେଶ୍ବରରେ ବିଭିନ୍ନ ମାର୍କେଟ କମ୍ପେଲ୍ସ ,ପରିବା ଦୋକାନ ,ରେଳ ଷ୍ଟେସନ ,ଏବଂ ଏକ ନମ୍ବର ମାର୍କେଟ ରେ ବେଧଡକ ଭାବରେ ସିଙ୍ଗଲ ୟୁଜ୍ ପ୍ଲାଷ୍ଟିକ ଓ ପଲଥିନ୍ ବ୍ୟବହାର କରାଯାଉଛି । ଏପରିକି ପ୍ଲାଷ୍ଟିକ ଦୋକାନ ମଧ୍ୟ ଖୋଲା ରହିଛି । ବେଧଡକ ଭାବରେ ପ୍ଲାଷ୍ଟିକ ଓ ପଲିଥିନ ବ୍ୟବହାର କରୁଛନ୍ତି ।

କମ୍ପାନୀ ଉପରେ କଟକଣା ନକରି ଦୋକାନୀ ଓ ଗ୍ରାହକ ମାନଙ୍କୁ ଧରିଲେ ଏହାର ସୁଫଳ ମିଳିବ ନାହିଁ ବୋଲି ଆରୋପ ଲଗାଇଛନ୍ତି ଗ୍ରାହକ । ଏଥିପାଇଁ ବ୍ୟାପକ ସଚେତନତା ସହ, ଦୃଢ କାର୍ଯ୍ୟାନୁଷ୍ଠାନ, ପ୍ଲାଷ୍ଟିକ ଆମଦାନୀ ଓ କମ୍ପାନୀ ମାନଙ୍କ ଉପରେ ରୋକ ଲଗାଇଲେ କିଛିମାତ୍ରାରେ ସୁଫଳ ମିଳିପାରିବ ବୋଲି ଅନେକ କହିଛନ୍ତି । ସେପଟେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ କହିଛନ୍ତି, ପ୍ରଥମେ ସ୍କୁଲ ଗୁଡିକୁ ପ୍ଲାଷ୍ଟିକ ମୁକ୍ତ କରିବା ସହ ସ୍କୁଲର ପିଲାଙ୍କୁ ବ୍ୟାପକ ସଚେତନତା କାର୍ଯ୍ୟକ୍ରମ କରାଯିବ ।

ସୂଚନା ଅନୁସାରେ ରାଜ୍ୟ ସରକାର ପ୍ରଥମେ ୨୦୧୮ ମସିହାରେ ୫ଟି ମହାନଗର ନିଗମରେ ପଲିଥିନ ଓ ପ୍ଲାଷ୍ଟିକ ବ୍ୟାନ କରିଥିଲେ । ମାତ୍ର କିଛି ଦିନର ଚଢାଉ ପରେ ଅବସ୍ଥା ଯାହା ଥିଲା ସମାନ ଅବସ୍ଥାକୁ ଫେରିଆସିଲା । ଆଉ ଏବେ ସାରା ରାଜ୍ୟରେ ପ୍ଲାଷ୍ଟିକ ବ୍ୟାନ ଗୁଟଖା ଓ ପଲିଥିନ ବ୍ୟାନ ପରି ପ୍ରହସନ ହେବ ନାହିଁ ତ ?

ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ