ପ୍ରଧାନମନ୍ତ୍ରୀଙ୍କ ଆହ୍ବାନ, 9ମିନିଟ ପାଇଁ ସାରା ରାଜ୍ୟରେ ଜଳିଲା ସଂକଳ୍ପର ଦୀପ

9 ମିନିଟ ପର୍ଯ୍ୟନ୍ତ ଦୀପ ଜାଳି ଦେଶବାସୀ ଏକାଗ୍ରତା ଓ ଏକତାର ପରିଚୟ ଦେଇଛନ୍ତି । ଏହାର ପ୍ରଭାବ ସାରା ରାଜ୍ୟରେ ମଧ୍ୟ ପଡିଛି । ପ୍ରତିଟି ନାଗରିକ ନିଜ ଘର ଆଗରେ ଓ ଛାତ ଉପରେ ଥାଇ ଦୀପ ଜାଳି ପ୍ରଧାନମନ୍ତ୍ରୀଙ୍କୁ ସମର୍ଥନ ଜଣାଇଥିଲେ ।

ନୂଆପଡା: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ବାନକ୍ରମେ ଦେଶବାସୀ ରାତି 9ଟାରେ ଦୀପ ଜାଳିଥିବା ଦେଖିବାକୁ ମିଳିଛି । 9 ମିନିଟ ପର୍ଯ୍ୟନ୍ତ ଦୀପ ଜାଳି ଦେଶବାସୀ ଏକାଗ୍ରତା ଓ ଏକତାର ପରିଚୟ ଦେଇଛନ୍ତି । ଏହାର ପ୍ରଭାବ ସାରା ରାଜ୍ୟରେ ମଧ୍ୟ ପଡିଛି । ପ୍ରତିଟି ନାଗରିକ ନିଜ ଘର ଆଗରେ ଓ ଛାତ ଉପରେ ଥାଇ ଦୀପ ଜାଳି ପ୍ରଧାନମନ୍ତ୍ରୀଙ୍କୁ ସମର୍ଥନ ଜଣାଇଥିଲେ ।

କିଛି ସ୍ଥାନରେ ଘଣ୍ଟ, ଶଙ୍ଖ, ହୁଳହୁଳି ଶବ୍ଦରେ ପ୍ରକମ୍ପିତ ହୋଇଥିଲା ପରିବେଶ । ମହାମାରୀ କୋରୋନାକୁ ବିନାଶ କରିବା ପାଇଁ କେବଳ ନୂଆପଡା ନୁହେଁ ବରଗଡ, ଯାଜପୁର, ସୁବର୍ଣ୍ଣପୁର, ବୌଦ୍ଧ ଆଦି ଜିଲ୍ଲାରେ ମଧ୍ୟ ପ୍ରଧାନମନ୍ତ୍ରୀଙ୍କ ଏହି ଆହ୍ବାନ ସଫଳତାର ରୂପ ନେଇଛି ।

ସେହିପରି ସୁବର୍ଣ୍ଣପୁରରେ ଆରାଧ୍ୟା ଦେବୀ ମା’ ସୁରେଶ୍ବରୀଙ୍କୁ ସ୍ମରଣ କରି ଦୀପ ଯଜ୍ଞରେ ଲୋକେ ସାମିଲ ହୋଇଥିବା ଦେଖିବାକୁ ମିଳିଥିଲା । ମନରେ କୋରୋନାକୁ ପରାସ୍ତ କରିବାକୁ ସଂକଳ୍ପ ନେଇ ଲୋକେ ଦୀପ ଜାଳିଥିଲେ । ବୌଦ୍ଧରେ ମଧ୍ୟ ଦେଖିବାକୁ ମିଳିଥିଲା କିଛି ନିଆରା ଦୃଶ୍ୟ । ମହିଳାମାନେ ଘରେ ଘରେ ଦୀପ ଜାଳିବା ସହ ଶିଳପୁଆ ପୂଜା କରୁଥିବାର ଦେଖିବାକୁ ମିଳିଥିଲା ।

ଯାଜପୁରରେ ମଧ୍ୟ ଲୋକେ ବେଶ ସତର୍କତାର ସହ ଦୀପ ଜାଳୁଥିବା ଦେଖିବାକୁ ମିଳିଥିଲା । ତେଣୁ ବାସ୍ତବରେ ଦୀପ ଜଳାଇ ଏକତାର ପରିଚୟ ଦେଇଛନ୍ତି ରାଜ୍ୟବାସୀ ବୋଲି କହିଲେ କିଛି ଭୁଲ ହେବ ନାହିଁ ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଯାଜପୁରରୁ ଜ୍ଞାନରଞ୍ଜନ ଓଝା, ବୌଦ୍ଧରୁ ସତ୍ୟନାରାୟଣ ପାଣି ଓ ନୂଆପଡାରୁ ମୋତିଲାଲ୍‌ ବାଗ୍‌, ଇଟିଭି ଭାରତ