ଭୁବନେଶ୍ବର: ୧୦ ପ୍ରତିଶତ ସୁଧ ରିଟର୍ଣ୍ଣ ଲୋଭ ଦେଖାଇ ଠକାମି । ଲୋକଙ୍କୁ ଅନଲାଇନରେ ସୁଧ କାରବାର ସୁବିଧା କହି ଠକାମିର ଜାଲ ବିଛାଇଥିଲେ ଠକ ଗ୍ୟାଙ୍ଗ । ଅଭିଯୋଗ ପାଇବା ପରେ ଆକାଉଣ୍ଟ ଟ୍ରାକ କରି ୧୩ ଲକ୍ଷରୁ ଅଧିକ ଟଙ୍କା ଜବତ କରିବା ସହ ମଧ୍ୟପ୍ରଦେଶରୁ ଜଣେ ଅଭିଯୁକ୍ତକୁ ଗିରଫ କରିଛି ପୋଲିସ । ଅଭିଯୁକ୍ତର ନା ଗୌର କୁମାର ବିଶ୍ବକର୍ମା । ଏବେବି ୫ ଠକ ଫେରାର ଥିବା ଜଣାପଡ଼ିଛି ।
ସୁଚନା ଅନୁସାରେ ସୁଧ କାରବାରରେ ଇନଭେଷ୍ଟମେଣ୍ଟ ପାଇଁ ଆଗ୍ରହୀ ଲୋକଙ୍କୁ ଅନଲାଇନରେ କିଟି କ୍ୟାସ ଗ୍ରୁପ କରି ଆଡ କରାଯାଉଥିଲା । ପରେ ସେମାନଙ୍କୁ ଆକାଉଣ୍ଟ ଡିଟେଲ ପଠାଇ ଟଙ୍କା ପଠାଇବାକୁ ଅଭିଯୁକ୍ତମାନେ କହୁଥିଲେ । ଟଙ୍କା ପଠାଉଥିବା ଲୋକଙ୍କୁ ୧୦୦୦ଟଙ୍କାରେ ୧ପ୍ରତିଶତ ସୁଧ ଦେବା ଆଳରେ ୧୦୦ଟଙ୍କା ୱାଲେଟ ଜରିଆରେ ରିଟର୍ଣ୍ଣ ଦେଉଥିଲେ । ୱାଲେଟରେ ଅତିକମରେ ୧ଲକ୍ଷ ଟଙ୍କା ହେଲେ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରାଯାଇପାରିବ ବୋଲି ଲୋଭ ଦେଖାଉଥିଲେ । କିନ୍ତୁ ୱାଲେଟ ଟଙ୍କାକୁ ଆକାଉଣ୍ଟକୁ ନ ପଠାଇ ଠକିନେଉଥିଲେ ।
ଏହିପରି ଠକାମିର ଶିକାର ହୋଇଛନ୍ତି ଭୁବନେଶ୍ବରର ଅଜୟ କୁମାର ସାହୁ । ୧୫ଲକ୍ଷ ଟଙ୍କା ବିନିଯୋଗ ପରେ ସେ ଠକାମିର ଶିକାର ହୋଇଥିବା ଜାଣିପାରିଥିଲେ । ଏନେଇ ସାଇବର ଥାନାରେ ଅଭିଯୋଗ କରିଥିଲେ ଅଜୟ । ଅଭିଯୋଗ ଅନୁସାରେ ଟ୍ରାକ କରି ୭ଟି ଆକାଉଣ୍ଟରୁ ୧୩ଲକ୍ଷରୁ ଊର୍ଦ୍ଧ୍ବ ଟଙ୍କା ଜବତ କରିବା ସହ ମଧ୍ୟପ୍ରଦେଶରୁ ଜଣେ ଅଭିଯୁକ୍ତକୁ ଗିରଫ କରିଛି ପୋଲିସ । ଠକ ଗ୍ୟାଙ୍ଗର ଆହୁରି ୫ ଜଣ ଫେରାର ଥିବା ପୋଲିସ ସୂଚନା ଦେଇଛି । ତେବେ ଆଜି ଗିରଫ ଅଭିଯୁକ୍ତକୁ କୋର୍ଟ ଚାଲାଣ କରାଯାଇଛି ।
ଇଟିଭି ଭାରତ, ଭୁବନେଶ୍ବର