ରାଜଧାନୀର ମୁକୁଳା ଡ୍ରେନ ନେଲା ବୃଦ୍ଧାଙ୍କ ଜୀବନ

ଘର ଆଗରେ ଥିବା ମୁକୁଳା ଡ୍ରେନ ସାଜିଲା କାଳ । ରାଜଧାନୀରେ ପ୍ରବଳ ବର୍ଷା ଯୋଗୁଁ ଡ୍ରେନରେ ଜମିଥିଲା ପାଣି । ବୃଦ୍ଧା ଜଣକ ଘରୁ ବାହାରକୁ ଆସୁଥିବା ବେଳେ ଡ୍ରେନରେ ଖସିପଡିବାରୁ ତାଙ୍କର ମୃତ୍ୟୁ ହୋଇଛି ।

ଭୁବନେଶ୍ବର: ରାଜଧାନୀରେ ବର୍ଷା ଜଳ ସାଜିଲା କାଳ । ମୁକୁଳା ଡ୍ରେନ ଯୋଗୁଁ ଚାଲିଗଲା ଜୀବନ। ଭୁବନେଶ୍ବର ନୟାପଲ୍ଲୀ ଥାନା ଅନ୍ତର୍ଗତ ସାଲିଆସାହି ଆଦିବାସୀ ଗାଁରେ ଘଟିଛି ଅଘଟଣ। ମୁକୁଳା ଡ୍ରେନରେ ବର୍ଷା ଜଳରେ ଭାସି ଯାଇ ଜଣେ ବୃଦ୍ଧା ପ୍ରାଣ ହରାଇଛନ୍ତି ।

ଆଜି ଅପରାହ୍ନରେ ଲଗାଣ ବର୍ଷାର ଏଭଳି ପରିସ୍ଥିତି ଉପୁଜିଥିଲା। ବୃଦ୍ଧା ଜଣକ ନିଜ ଘର ବାହାର ମୁକୁଳା ଡ୍ରେନରେ ପଡିଯିବାରୁ ଅଣନିଶ୍ବାସୀ ହୋଇଯାଇଥିଲେ । ବୃଦ୍ଧାଙ୍କ ନାମ ଟି ଆପଲମା ବୋଲି ଜଣାପଡିଛି। ସେ ବର୍ଷେ ହେବ ସାଲିଆ ସାହି ଆଦିବାସି ଗାଁରେ ରହୁଛନ୍ତି। ତାଙ୍କ ଘର ଆନ୍ଧ୍ରପ୍ରଦେଶରେ ବୋଲି ଜଣାପଡିଛି। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଉଦ୍ଧାର କରିଛି। ଏନେଇ ସ୍ଥାନୀୟ ଲୋକଙ୍କ ମଧ୍ୟରେ ମୁକୁଳା ଡ୍ରେନ ପାଇଁ ଉତ୍ତେଜନା ପ୍ରକାଶ ପାଇଛି।

ଭୁବନେଶ୍ବରରୁ ତାପସ ପରିଡା,ଇଟିଭି ଭାରତ