ସୁନ୍ଦରଗଡ: ଦୀର୍ଘ 20 ବର୍ଷ କାଳ ପାକିସ୍ତାନ ଜେଲରେ କାରାଦଣ୍ଡ କାଟିବା ପରେ ଏବେ ନିଜ ଘରକୁ ଫେରୁଛନ୍ତି ଓଡିଆ ପୁଅ । ସୁନ୍ଦରଗଡ ଜିଲ୍ଲା କୁଟ୍ରା ବ୍ଲକ ଅନ୍ତର୍ଗତ କାଟଙ୍ଗ ଗାଁ ଅଧିବାସୀ ବିର୍ଜୁ କୁଲୁଙ୍କୁ 20 ବର୍ଷ ପୂର୍ବରୁ ଭାରତୀୟ ଗୁଇନ୍ଦା ବିଭାଗର ଏଜେଣ୍ଟ ଭାବେ ସନ୍ଦେହ କରି ବନ୍ଦୀ କରିନେଇଥିଲା ପାକିସ୍ତାନ ସେନା ।
ତେବେ 20 ବର୍ଷ ପରେ ସୁନ୍ଦର ଗଡର ବିର୍ଜୁ କୁଲୁ ପାକିସ୍ତାନରୁ ନିଜ ଜନ୍ମସ୍ଥାନ କାଟଙ୍ଗ ନଙ୍ଗାଟୋଲିକୁ ଫେରିବେ । ପୁଅର ଫେରିବା ଖବର ପାଇ ବେଶ ଉତ୍କଣ୍ଠାର ସହ ଚାହିଁ ବସିଛନ୍ତି ବିର୍ଜୁଙ୍କ ପରିବାର ଲୋକ ।
ଦୀର୍ଘ 20 ବର୍ଷ ପରେ ପାକିସ୍ତାନ ଜେଲରୁ ମୁକ୍ତ ହୋଇ ଘରକୁ ଫେରିବେ ଓଡିଆ ପୁଅ
ସୂଚନା ଅନୁଯାୟୀ ବିର୍ଜୁ ତାଙ୍କ ବାପା କମଲିସ କୁଲୁଙ୍କ ଏକମାତ୍ର ପୁଅ ହୋଇଥିବା ବେଳେ ସେ ପିଲା ଦିନରୁ ହିଁ ମାନସିକ ବିକାରଗ୍ରସ୍ତ ଥିଲେ । ତେବେ ତାଙ୍କୁ ଯେତେବେଳେ 25 ବର୍ଷ ହୋଇଥିଲା, ସେ କେଉଁଆଡେ ଚାଲିଯାଇଥିଲେ । ଅନେକ ଖୋଜାଖୋଜି ପରେ ମଧ୍ୟ ପୁଅର କୌଣସି ଖୋଜ ଖବର ପାଇନଥିଲେ ପରିବାର ।