ନୂଆଦିଲ୍ଲୀ: ସଂସଦରେ ରାଷ୍ଟ୍ରପତିଙ୍କ ଅଭିଭାଷଣର ଧନ୍ୟବାଦ ଚର୍ଚ୍ଚା ସମୟରେ ଓଡିଶାର ଅନେକ ପ୍ରସଂଗ ଉପରେ ମତ ରଖିଛନ୍ତି ବିଜେଡି ସାଂସଦ ପିନାକୀ ମଶ୍ର । ରାଜ୍ୟ ସରକାର କୋଭିଡ ଯୋଦ୍ଧାଙ୍କୁ କେନ୍ଦ୍ର ସହାୟତା ଛଡା ୫୦ ଲକ୍ଷ ଟଙ୍କାର ପ୍ରୋତ୍ସାହନ ଦେବାକୁ ଘୋଷଣା କରିଥିଲେ । ତେବେ କେନ୍ଦ୍ର ସରକାର ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅନୁସରଣ କରନ୍ତୁ ବୋଲି ବୋଲି କହିଛନ୍ତି ସାଂସଦ ପିନାକୀ ମିଶ୍ର ।
ସାଂସଦ ମିଶ୍ର କହିଛନ୍ତି ଦେଶରେ ଜାରି ରହିଥିବା ବିଶ୍ବର ସର୍ବବୃହତ ମେଗା ଟୀକାକରଣ ଅଭିଯାନ ଗର୍ବର ବିଷୟ । ତେବେ ଏହି ଟୀକାକରଣ ଅଭିଯାନରେ ଓଡିଶା ଆଗରେ ରହିଛି । ବର୍ତ୍ତମାନ ସୁଦ୍ଧା 58 ପ୍ରତିଶତ ସ୍ବାସ୍ଥ୍ୟକର୍ମୀଙ୍କୁ ଟିକା ଦିଆଯାଇସାରିଲାଣି । ଏହା ଦେଶରେ ସର୍ବାଧିକ ବୋଲି ସେ କହିଛନ୍ତି । ପିନାକୀ କହିଛନ୍ତି, ସ୍ବାସ୍ଥ୍ୟ କ୍ଷେତ୍ରରେ ବ୍ୟାପକ ଇନଫ୍ରାଷ୍ଟ୍ରକଚର ଦିଗରେ ସରକାର ଗୁରୁତ୍ବ ଦେବା ଦରକାର । ଓଡିଶାରେ ଆଉ ଏକ ଏମ୍ସର ମଧ୍ୟ ସେ ଦାବି କରିଛନ୍ତି । ମିଶ୍ର କହିଛନ୍ତି ମହାମାରୀ ସମୟରେ ଓଡିଶା ପ୍ରଥମ ରାଜ୍ୟ ଭାବରେ ସମସ୍ତ ଜିଲ୍ଲାରେ କୋଭିଡ ହସ୍ପିଟାଲ ଖୋଲିଥିଲା ।
ବିଜେଡି ସାଂସଦ କହିଛନ୍ତି ଅଧିକରୁ ଅଧିକ ଟୀକାକରଣ କରିବାର ଆବଶ୍ୟକତା ରହିଛି । ଅନେକ ବିଶ୍ବ ନେତା କୋରୋନା ଟିକା ନେଇସାରିଥିବା ବେଳେ ଭାରତରେ ମଧ୍ୟ ପ୍ରଧାନମନ୍ତ୍ରୀ, ରାଷ୍ଟ୍ରପତି ଓ ବଡ ବଡ ବ୍ୟକ୍ତି ବିଶେଷଙ୍କୁ କୋରୋନା ଟିକା ଖୁବ ଶୀଘ୍ର ଦେବାକୁ ଦାବି କରିଛନ୍ତି ସାଂସଦ ମିଶ୍ର ।