ଭୁବନେଶ୍ବର: ପୂର୍ବ ପ୍ରସ୍ତୁତି ଅନୁସାରେ ମନ୍ତ୍ରିମଣ୍ଡଳ ପୁନର୍ବିନ୍ୟାସ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। କିନ୍ତୁ ଆଶା ଅନୁସାରେ ବିଭାଗ ମିଳିନଥିବାରୁ ଅନେକ ମନ୍ତ୍ରୀ ଅସନ୍ତୋଷ ପ୍ରକାଶ କରିଛନ୍ତି । ଯାହାକୁ ପ୍ରଶମିତ କରିବା ଲାଗି ଅଣ୍ଟା ଭିଡିଛନ୍ତି ନବୀନ। ଅସନ୍ତୁଷ୍ଟ ମନ୍ତ୍ରୀ ଓ ନେତାଙ୍କୁ ନବୀନ ନିବାସ ଡାକି ଆଲୋଚନା କରିଛନ୍ତି ଖୋଦ ନବୀନ । ଆସନ୍ତାକାଲି ଆଉ କିଛି ମନ୍ତ୍ରୀଙ୍କୁ ଡାକିଛନ୍ତି ନବୀନ।
ସେଥିପାଇଁ ଜଣକ ପରେ ଜଣେ ଅସନ୍ତୁଷ୍ଟ ମନ୍ତ୍ରୀଙ୍କୁ ନବୀନ ନିବାସ ଡାକି ମାନଭଞ୍ଜନ କରୁଛନ୍ତି ନବୀନ। ନବୀନ ନିବାସରୁ ଡାକରା ପାଇ ଆଜି ପହଁଚିଥିଲେ ରାଜେନ୍ଦ୍ର ଢୋଲକିଆ । ତାଙ୍କୁ ମିଳିଛି କ୍ୟାବିନେଟ ପାହ୍ୟାର ଯୋଜନା ଏବଂ ସଂଯୋଜନା ବିଭାଗ । ହେଲେ ସେ ଅସନ୍ତୁଷ୍ଟ ଥିବା ଚର୍ଚ୍ଚା ହେଉଛି । ବିଭାଗ ଗୌଣ ବୋଲି ରାଜେନ୍ଦ୍ରଙ୍କ ସମର୍ଥକ ଅଭିଯୋଗ କରୁଛନ୍ତି । ଅନ୍ୟ ଗୁରୁତ୍ବପୂର୍ଣ୍ଣ ବିଭାଗ ଦିଆଯାଇଥିଲେ ଭଲ ହୋଇଥାନ୍ତା ବୋଲି ସମର୍ଥକ ଦାବି କରୁଛନ୍ତି । ଖବର ମିଳିବା ପରେ ରାଜେନ୍ଦ୍ରଙ୍କୁ ନବୀନ ନିବାସ ଡକାଯାଇଛି ବୋଲି ଚର୍ଚ୍ଚା ହୋଇଛି । ତେଣୁ ତାଙ୍କୁ ଡାକି ମୁଖ୍ୟମନ୍ତ୍ରୀ ପ୍ରାୟ 30 ମିନିଟ ଆଲୋଚନା କରିଛନ୍ତି । ମୁଖ୍ୟମନ୍ତ୍ରୀଙ୍କୁ ଭେଟିବା ପରେ ପ୍ରତିକ୍ରିୟା ରଖିଛନ୍ତି ରାଜେନ୍ଦ୍ର । କାମ କରିବା ଲାଗି ବିଭାଗର ଆବଶ୍ୟକତା କିଛି ନାହିଁ ବୋଲି ସେ କହିଛନ୍ତି । ସେହିପରି ବିଜ୍ଞାନ ଏବଂ କାରିଗରୀ, ସାମାଜିକ ସୁରକ୍ଷା ଏବଂ ଭିନ୍ନକ୍ଷମ ସଶକ୍ତିକରଣ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଓ ସ୍କୁଲ ଏବଂ ଗଣଶିକ୍ଷା ମନ୍ତ୍ରୀ ସମୀର ଦାସ ବିଭାଗ ନେଇ ମନ ଉଣା କରିଥିବା ଚର୍ଚ୍ଚା ହେଉଛି । ଅଶୋକଙ୍କୁ କ୍ୟାବିନେଟ ଓ ସମୀରଙ୍କୁ ରାଷ୍ଟ୍ର ପାହ୍ୟା ସନ୍ତୁଷ୍ଟ ହେବାକୁ ପଡିଛି । ଉଭୟ ଅନ୍ୟ ଗୁରୁତ୍ବପୂର୍ଣ୍ଣ ବିଭାଗ ମିଳିବ ବୋଲି ଆଶା ବାନ୍ଧିଥିଲେ । ଏମିତିକି ଅଶୋକଙ୍କୁ ନଗର ଉନ୍ନୟନ ବିଭାଗ ମିଳିବ ବୋଲି ତାଙ୍କ କର୍ମୀ କହି ବୁଲୁଥିଲେ । ହେଲେ ସେହି ସମାନ ବିଭାଗ ମିଳିବା ପରେ ଉଭୟ ମନ ଉଣା କରିଥିବା କୁହାଯାଉଛି । ଉଭୟଙ୍କୁ ନବୀନ ନିବାସ ଡାକରା ହୋଇଛି ବୋଲି କୁହାଯାଉଛି ।