ଭୁବନେଶ୍ବର: ଖଣି ମାଲିକ ଉଭୟ ସରକାର ଓ ବିରୋଧୀଙ୍କୁ ପକେଟରେ ରଖିଛନ୍ତି । ଯେଉଁଥିପାଇଁ ବାଚସ୍ପତି ଖଣି ପ୍ରସଙ୍ଗରେ ଆଲୋଚନା କରିବାକୁ ସମୟ ଦେଉନାହାଁନ୍ତି । ଆଜି ବିଧାନ ସଭାରେ ଶୂନ୍ୟକାଳରେ ଖଣି ପ୍ରସଙ୍ଗରେ ମୁଲତବୀ ପ୍ରସ୍ତାବ ମାଧ୍ୟମରେ ଆଲୋଚନା ଦାବି କରି ଏହି ଅଭିଯୋଗ ଆଣିଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା ।
ଏହାସହ କଂଗ୍ରେସ ଦଳ ସଦସ୍ୟ ମାନେ ଗୃହ ମଧ୍ୟଭାଗକୁ ଆସି ହଟ୍ଟଗୋଳ କରିବାରୁ ଗୃହକାର୍ଯ୍ୟ ଦିନ ୪ ଟା ପର୍ଯ୍ୟନ୍ତ ବାଚସ୍ପତି ମୁଲତବୀ ରଖିଛନ୍ତି । କଂଗ୍ରେସ ବିଧାୟକ ଦଳ ମୁଖ୍ୟ ସଚେତକ ତାରା ବାହନୀପତି ଓ ବିଧାୟକ ସନ୍ତୋଷ ସିଂହ ସାଲୁଜା ଆଜି ଶୂନ୍ୟକାଳରେ ଖଣି ଦୁର୍ନିତୀ ପ୍ରସଙ୍ଗ ଉଠାଇଥିଲେ । ଅଭିଯୋଗ କରିଥିଲେ ପ୍ରାୟ ୩ ବର୍ଷ ହେଲା ଖଣି ପ୍ରସଙ୍ଗରେ ଗୃହରେ ମୁଲତବୀ ପ୍ରସ୍ତାବ ନେଇ ଆଲୋଚନା ପାଇଁ ବିରୋଧୀ ଦଳଙ୍କୁ ସମୟ ଦିଆଯାଉନାହିଁ।
ବେଆଇନ ଖଣି ଉତ୍ତୋଳନ ପ୍ରସଙ୍ଗରେ ସନ୍ତୋଷ ସିଂହ ସାଲୁଜା ଅଭିଯୋଗ ଆଣିଛନ୍ତି ଯେ ପ୍ରିମିୟମ ଦାମ ଖଣି ନିଲାମ ନିଆଯାଇଛି। ହେଲେ ନିଲାମ ନେଇଥିବା ଖଣି କଂପାନୀ ମାନେ ଉଚ୍ଚମାନର ଖଣିଜ ଉତ୍ତୋଳନ କରି ନିମ୍ନ ମାନର ଖଣିଜ ମୂଲ୍ୟରେ ବିକ୍ରି କରାଯାଉଥିବା ଦର୍ଶାଇ ରାଜସ୍ବ ହଡପ କରୁଛନ୍ତି। ଯାହା ଫଳରେ ରାଜ୍ୟ ସରକାର ହଜାର ହଜାର କୋଟି ଟଙ୍କାର କ୍ଷତି ସହୁଛନ୍ତି। ଆଜିର ଦିନରେ ଏହି କ୍ଷତିର ପରିମାଣ ୫୦ ହଜାର ଲକ୍ଷ କୋଟି ହେବ ବୋଲି ସାଲୁଜା ଅଭିଯୋଗ ଆଣିଥିଲେ।