ଭୁବନେଶ୍ବର: ପଞ୍ଚାୟତ ନିର୍ବାଚନରେ ସଂରକ୍ଷଣକୁ ନେଇ ରାଜ୍ୟପାଳଙ୍କ ଦ୍ବାରସ୍ଥ ହେଲେ ବିଜେପି ବିଧାୟକ ଦଳ । ଆଜି ରାଜଭବନ ଯାଇ ରାଜ୍ୟପାଳଙ୍କୁ ସାକ୍ଷତ କରି ଏନେଇ ଦାବି ପତ୍ର ଦେଇଛନ୍ତି ବିଧାୟକ ଦଳ ।
ବିଧାୟକ ଦଳ ଦାବି କରିଛନ୍ତି ପଞ୍ଚାୟତ ନିର୍ବାଚନରେ ଓବିସି ବର୍ଗଙ୍କ ପାଇଁ ସଂରକ୍ଷଣକୁ ସୁନିଶ୍ଚିତ କରି ପଞ୍ଚାୟତ ନିର୍ବାଚନ କରାଯାଉ । ଏଥିପାଇଁ ରାଜ୍ୟପାଳଙ୍କ ହସ୍ତକ୍ଷେପ ଲୋଡିଛନ୍ତି ବିଧାୟକ ମାନେ ।
ବିଧାୟକ ମାନେ ରାଜ୍ୟପାଳଙ୍କ ନିକଟରେ ଫେରାଦ ହୋଇ କହିଛନ୍ତି ସରକାର ଯେଉଁ ନୂତନ ସଂରକ୍ଷଣ ଚିଠା ତାଳିକା ପ୍ରସ୍ତୁତ କରିଛନ୍ତି, ସେଥିରେ ପଛୁଆବର୍ଗଙ୍କୁ ବାଦ ଦେଇଛନ୍ତି । ରାଜ୍ୟରେ ମୋଟ 52 ପ୍ରତିଶତ ପଛୁଆବର୍ଗର ଲୋକ ବସବାସ କରୁଛନ୍ତି । ଯଦି ତାଙ୍କୁ ବାଦ ଦେଇ ନିର୍ବାଚନ କରାଯାଏ, ଏହା ଉଚ୍ଚିତ ହେବ ନାହିଁ । ଓବିସି ବର୍ଗଙ୍କୁ ତାଙ୍କର ସାମ୍ବିଧାନିକ ଅଧିକାର ମିଳିବ ନାହିଁ । ତେଣୁ ରାଜ୍ୟପାଳ ହସ୍ତକ୍ଷେପ କରନ୍ତୁ । ପଛୁଆ ବର୍ଗଙ୍କୁ ସଂରକ୍ଷଣ ଦେଇ ନିର୍ବାଚନ କରାଯାଉ ବୋଲି ବିଜେପି ବିଧାୟକ ମାନେ ଦାବି କରିଛନ୍ତି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ