ଭୁବନେଶ୍ବର: ଆସନ୍ତା 3 ତାରିଖ ଯାଏଁ ଗୃହ ମୁଲତବୀ । ଏପ୍ରିଲ 3 ତାରିଖ ୧୦.୩୦ ପର୍ଯ୍ୟନ୍ତ ଗୃହ ମୁଲତବୀ କଲେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ।
ତେବେ ବୁଧବାର ବିଧାନସଭାରେ ଓଡିଶା ବ୍ୟୟ ମଞ୍ଜୁରୀ ବିଲ୍ ୨୦୨୧ ପାରିତ ହୋଇଛି । ଏହି ବିଲକୁ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ବିଚାର ଓ ପାରିତ ନିମନ୍ତେ ଗୃହରେ ଆଗତ କରାଇଥିଲେ । ରାଜ୍ୟ ସରକାରଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନା ଓ ପ୍ରସାଶନିକ ବ୍ୟୟ ବାବଦକୁ ୨୦୨୧-୨୨ ଆର୍ଥିକ ବର୍ଷ ନିମନ୍ତେ ସମୁଦାୟ ୧ ଲକ୍ଷ ୭୫ ହଜାର ୮୯୦ କୋଟି ୨୩ ଲକ୍ଷ ୬୦ ହଜାର ଟଙ୍କା ବ୍ୟୟ ବରାଦ କରାଯାଇଛି । ବିଲ୍ ଉପରେ ବିସ୍ତୃତ ଆଲୋଚନା ଓ ବିଚାର ପରେ ବିଧାନସଭାରେ ବାଚସ୍ପତି ଏହାକୁ ପାରିତ କରିଛନ୍ତି ।
ଏପଟେ ବୁଧବାର ବିଧାନସଭାରେ ଆଲୋଚନାରେ ଅଂଶଗ୍ରହଣ କରି ବିରୋଧୀ ଦଳ ନେତା ପ୍ରଦୀପ୍ତ ନାୟକ ରାଜ୍ୟରେ ଆଇନଶୃଙ୍ଖଳା ପରିସ୍ଥିତି, ଶିଶୁ ନିଖୋଜ, ମହିଳା ନିର୍ଯ୍ୟାତନା ଆଦି ପ୍ରସଙ୍ଗ ଉଠାଇ ସରକାରଙ୍କ ଉପରେ ବର୍ଷିଥିଲେ । ସେହିପରି ଆଲୋଚନାରେ ଅଂଶଗ୍ରହଣ କରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି ଯେ, ଏହି ବ୍ୟୟ ମଞ୍ଜୁରୀ ବିଲକୁ ସମର୍ଥନ କରିପାରୁନାହାନ୍ତି । ରାଜ୍ୟ ସରକାରଙ୍କ ପକ୍ଷରୁ ଜାରି ହୋଇଥିବା ସ୍ଵେତପତ୍ରରେ ସରକାରଙ୍କ ବିଫଳତାକୁ ପଦାରେ ପକାଇଛି । ଯଦି ଆଇନଶୃଙ୍ଖଳା ପରସ୍ଥିତି ଯଦି ନିୟନ୍ତ୍ରଣ ଥାଏ, ପୋଲିସ ୮ଥର ଗୁଳିଚାଳନା କଥା ସ୍ଵେତପତ୍ରରେ କାହିଁକି ଉଲ୍ଲେଖ ରହିଛି ବୋଲି ପ୍ରଶ୍ନ କରିଛନ୍ତି ସେ । ଦିନକୁ ୮ ଜଣ ଦୁଷ୍କର୍ମରେ ଶୀକାର ହେଉଛନ୍ତି । ରାଜ୍ୟ ସରକାରଙ୍କ ଜାରି ହୋଇଥିବା ସ୍ଵେତପତ୍ର ବାସ୍ତବରେ କଳାପତ୍ର କହିଲେ ନରସିଂହ ।
ଏପଟେ ଏହି ବଜେଟ ମହାମାରୀ ମୁକାବିଲା ଓ ଭଲ ସ୍ଵାସ୍ଥ୍ୟ ସେବା ପାଇଁ ୧୩ ହଜାର କୋଟି ଟଙ୍କା ବ୍ୟୟବରାଦ କରାଯାଇଛି । ଏସସିବିକୁ ଏମ୍ସ ପ୍ଲସ କରିବା ପାଇଁ ୩ ବର୍ଷରେ ୩ ହଜାର ୫୦୦ କୋଟି ଟଙ୍କା ଦିଆଯାଇଛି ।୧୩-୧୪ରୁ ସ୍ଵତନ୍ତ୍ର କୃଷି ବଜେଟ ଆଗତ କରି ଆସୁଛୁ ବୋଲି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି । 2013-14ରେ ୭ହଜାର ୧୬୨ କୋଟି ଥିବାବେଳେ ୨୧-୨୨ ୧୭ ହଜାର ୪୬୮ କୋଟିରେ ପହଞ୍ଚିଛି । ଦକ୍ଷତା ବିକାଶ, ସ୍ଵୟଂ ସହାୟକ ଗୋଷ୍ଠୀ ମାନଙ୍କୁ ଓ ଏମଏସଏମଇ କ୍ଷେତ୍ରକୁ ପ୍ରାଧାନ୍ୟ ଦିଆଯାଇଛି । ବିତୀୟ ପରିଚାଳନା ପାଇଁ ପଞ୍ଚଦଶ ଅର୍ଥ କମିଶନ ପ୍ରଶଂସା କରିଛନ୍ତି । ମନ୍ତ୍ରୀଙ୍କ ଉତ୍ତରରେ ଅସନ୍ତୋଷ ହୋଇ ବିରୋଧୀ ଦଳର କକ୍ଷତ୍ୟାଗ ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ