ଭୁବନେଶ୍ବର: ଷୋଡଶ ବିଧାନସଭା ଅଷ୍ଟମ ଅଧିବେଶନର ଆଜି ସପ୍ତମ ଦିନରେ ମଧ୍ୟ ବିଧାନସଭାରେ ଜାରି ରହିଛି ଅଚଳାବସ୍ଥା । ବିରୋଧୀଙ୍କ ଦାବି ସରକାରଙ୍କ ଜିଦ ଆଗରେ ଧୋଇଗଲା ପ୍ରଶ୍ନକାଳ ସମେତ ଶୂନ୍ୟକାଳ ।
ବାରୁମ୍ବାର ଗୃହ ମୁଲତବୀ କଲେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର (Spekaer Surjya Narayan Patra) । ପ୍ରଥମେ ପୂର୍ବାହ୍ନ 11.30, ଦ୍ବିତୀୟରେ 12 ଟା ପୁଣି 12.32 ପୁଣି ଅପରାହ୍ନ 4.32 ପର୍ଯ୍ୟନ୍ତ ମୁଲତବୀ ରଖି ଡାକିଥିଲେ ସର୍ବଦଳୀୟ ବୈଠକ । ସର୍ବଦଳୀୟ ବୈଠକ ଫେଲ ମାରିବା ପରେ ପୁଣି ଗୁରୁବାର ପୂର୍ବାହ୍ନ 10.30 ପର୍ଯ୍ୟନ୍ତ ଗୃହକୁ ମୁଲତବୀ ରଖିଛନ୍ତି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ।
ଆଜି ଗୃହ ଆରମ୍ଭ ହେବା ମାତ୍ରେ ବିରୋଧୀ ବିଜେପି ମମିତା ହତ୍ୟାକାରୀ ଗୋବିନ୍ଦ ସାହୁଙ୍କ ଫଟୋ ଦେଖାଇ ହଙ୍ଗାମା କରିଥିବା ବେଳେ, ଶାସକ ଦଳ ମଧ୍ୟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କରିଛି ଟାର୍ଗେଟ । ଧର୍ମେନ୍ଦ୍ରଙ୍କ କଣ୍ଟାବାଞ୍ଜି ଗସ୍ତ ବେଳେ ମୋହନ ଲାଲ ଶର୍ମାଙ୍କ ସହ ଥିବା ଫଟୋ ପ୍ରଦର୍ଶନ କରି ପାଲଟା ଆକ୍ରମଣ କରିଛି । ଆଉ ଉଭୟଙ୍କୁ ଟାର୍ଗେଟ କରି କଂଗ୍ରେସ କରିଛି ଘଣ୍ଟ ମାଡ । ଫଳରେ କିଛି ମିନିଟ ମଧ୍ୟରେ ଗୋଟିଏ ଘଣ୍ଟା ପାଇଁ ପୂର୍ବାହ୍ନ ୧୧.୩୦ ପର୍ଯ୍ୟନ୍ତ ଗୃହକୁ ମୁଲତବୀ କରିଥିଲେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ।
ପରେ ୧୧.୩୦ ରେ ଗୃହ କାର୍ଯ୍ୟ ଆରମ୍ଭ ହେବା ମାତ୍ରେ ପୁଣିଥରେ ଉଭୟ ବିରୋଧୀ ବିଜେପି ଓ କଂଗ୍ରେସ କରିଥିଲେ ମିଳିତ ହଙ୍ଗାମା ହଟ୍ଟାଗୋଳ । ଫଳରେ ନିରୁପାୟ ବାଚସ୍ପତି ଆଜି ସିଧା ସଳଖ ଅପରାହ୍ନ ଯାଏଁ ଗୃହକୁ ମୁଲତବୀ ନକରି ପୁଣି ଅଧଘଣ୍ଟା ତଥା ୧୨ ଟା ଯାଏଁ ମୁଲତବୀ ରଖି ଡାକିଥିଲେ ସର୍ବଦଳୀୟ ବୈଠକ । ସର୍ବଦଳୀୟ ବୈଠକ ପରେ ଆରମ୍ଭ ହୋଇଥିବା ଗୃହ ପୁଣି ଥରେ ଅଚଳାବସ୍ଥା ଲାଗି ରହିଲା । ଫଳରେ ପୁଣି ଥରେ ଗୃହକୁ ଅପରାହ୍ନ 4 ଟା ପର୍ଯ୍ୟନ୍ତ ମୁଲତବୀ କରିଥିଲେ ବାଚସ୍ପତି । ଏବେ ଆରମ୍ଭ ହେବା ପରେ ପୁଣି 4 ଟା 32 ପର୍ଯ୍ୟନ୍ତ ମୁଲତବୀ କଲେ ବାଚସ୍ପତି । ଫଳରେ ବିରୋଧୀଙ୍କ ହଟ୍ଟଗୋଳ ଯୋଗୁଁ ଆଲୋଚନା ସମ୍ଭବ ହେଉନଥିବାରୁ ସ୍ବରାଷ୍ଟ୍ର ଓ ସାଧାରଣ ପ୍ରଶାସନ ବିଭାଗର ବିଭିନ୍ନ ପ୍ରସ୍ତାବ ଗିଲୋଟିନକୁ ଗଲା। ଏହାପରେ ବାଚସ୍ପତି ଆସନ୍ତାକାଲି( ଗୁରୁବାର) ପୂର୍ବାହ୍ନ ପର୍ଯ୍ୟନ୍ତ ବିଧାନସଭାକୁ ମୁଲତବୀ ରଖିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ