ଭୁବନେଶ୍ବର: ବୟସ ମାତ୍ର ୧୧ ବର୍ଷ । କିନ୍ତୁ ତାଙ୍କ ମିମିକ୍ରି ଦେଖିଲେ ଆପଣ ମଧ୍ୟ ହୋଇଯିବେ ଆଶ୍ଚର୍ଯ୍ୟ । ସେ ଶାହାରୁଖ ଖାନ ହୁଅନ୍ତୁ କି ନାନା ପାଟେକର, ସଭିଙ୍କ ଅବିକଳ ମିମିକ୍ରି କରିପାରୁଛନ୍ତି ପୁରୀ ସତ୍ୟବାଦୀ ବୀରରାମଚନ୍ଦ୍ରପୁରର ଏହି କୁନି କଳାକାର ଅନିକେତ । ଯାହାକି ତାଙ୍କୁ ଆଜି ପହଞ୍ଚାଇଛି ଜାତୀୟସ୍ତରରେ । ପଞ୍ଜାବ ରିଆଲିଟି ଶୋରେ ‘କିସମେ କିତନା ହେ ଦମ’ରେ ସେ ଜଲୱା ଦେଖାଇ ଓଡିଶାକୁ କରିଛନ୍ତି ଗର୍ବିତ । ଅନଲାଇନ ଅଡିସନ ମାଧ୍ୟମରେ ସେ ଏହି ଶୋ'ରେ ପ୍ରବେଶ କରି ବର୍ତ୍ତମାନ ହୋଇଛନ୍ତି ଫାଇନାଲିଷ୍ଟ ।
ପୁରୀ ଜିଲ୍ଲା ସତ୍ୟବାଦୀ ବ୍ଲକ ବୀରରାମଚନ୍ଦ୍ରପୁର ଗାଁର ପୁଅ ହେଉଛନ୍ତି ଅନିକେତ ମିଶ୍ର। ବଲିଓଡ଼ ଷ୍ଟାରମାନଙ୍କ ମିମିକ୍ରି କରି ବେଶ ସୁନାମ ଅର୍ଜନ କରିଛନ୍ତି ସେ । ଅନଲାଇନ ଅଡିସନ ମାଧ୍ୟମରେ ସେ ଏହି ରିଆଲିଟି ଶୋରେ ପ୍ରବେଶ କରିଥିଲେ । ଆଉ ମିମିକ୍ରି ବର୍ଗରେ ନିଜର ପାରଦର୍ଶିତା ଦେଖାଇ ସେ ବିଭିନ୍ନ ରାଉଣ୍ଡ ଜିତି ଫାଇନାଲରେ ପ୍ରବେଶ କରିଛନ୍ତି । ନାନା ପାଟେକରଙ୍କଠୁ ଆରମ୍ଭ କରି ସୁପରଷ୍ଟାର ଶାହରୁଖଙ୍କ ସମେତ ଅନେକ ବଲିଓଡ଼ ଅଭିନେତାଙ୍କ ନକଲ ବା ମିମିକ୍ରି କରିପାରୁଛନ୍ତି ଅନିକେତ । ଏମିତି ମିମିକ୍ରି ପାଇଁ ଖାଲି ପ୍ରଶଂସିତ ନୁହନ୍ତି ଏଥିପାଇଁ ଅନେକ ଜାତୀୟ ଓ ଅନ୍ତର୍ଜାତୀୟ ପୁରସ୍କାର ମଧ୍ୟ ଜିତିଛନ୍ତି ସେ । କିଛି ଶୋରେ ସେ ପ୍ରଥମ ମଧ୍ୟ ହୋଇଛନ୍ତି । ଅନିକେତ ବର୍ତ୍ତମାନ ୟୁନିଟ ୧ ମଦର ପବ୍ଲିକ ସ୍କୁଲରେ ପଞ୍ଚମ ଶ୍ରେଣୀରେ ପଢ଼ୁଛନ୍ତି ।