ଭୁବନେଶ୍ବର: ଦୁଃଖୀ ଗରିବ ଅସହାୟଙ୍କ ଦରଦୀ ବନ୍ଧୁ ଇଞ୍ଜିନିୟର ଦିଲୀପ ପଟ୍ଟନାୟକ । ଆଧୁନିକତାର ଚାକଚକ୍ୟରେ ଭରପୂର ବେଙ୍ଗାଲୁର ସହରରେ ଆରମ୍ଭ କରିଥିଲେ ନିଜ କର୍ମମୟ ଜୀବନ । ହେଲେ ରାଜ୍ୟର ଦୁଃଖି ଗରିବ ଅସହାୟଙ୍କ ଦୁର୍ଦିନ ତାଙ୍କୁ ସବୁବେଳେ ବିଚଳିତ କରୁଥିଲା । ଯାହା ଫଳରେ ସେ ସମାଜ ସେବାକୁ ନିଜ ଜୀବନର ବ୍ରତ ଭାବେ ଗ୍ରହଣ କଲେ । ଆଉ 1999 ମସିହା ମହାବାତ୍ୟା ପରେ ରାଜ୍ୟର ଅବସ୍ଥା ଦେଖି ସେ ନିଜକୁ ସମ୍ଭାଳି ପାରିଲେ ନାହିଁ । ଗରିବ ଅସହାୟ ରୋଗୀଙ୍କ ସେବା ପାଇଁ ନିର୍ମଳା ସ୍ମୃତି ବିକାଶ ଟ୍ରଷ୍ଟ ଆରମ୍ଭ କଲେ ।
ଏହି ଟ୍ରଷ୍ଟ ମାଧ୍ୟମରେ ବିଭିନ୍ନ ବିଶେଷଜ୍ଞଙ୍କୁ ସେ ଯୋଗାଯୋଗ କରିବା ସହ ଦିଲୀପ ଆଜି ପର୍ଯ୍ୟନ୍ତ 4ହଜାରରୁ ଅଧିକ ଗ୍ରହଣ ଖଣ୍ଡିଆ ଶିଶୁଙ୍କ ଅସ୍ତ୍ରପୋଚାର ମାଗଣାରେ କରାଇଛନ୍ତି । ଖାଲି ଏତିକି ନୁହେଁ ଦୀଲିପ 12 ହଜାରରୁ ଉର୍ଦ୍ଧ୍ବଙ୍କ ଚକ୍ଷୁ ଚିକିତ୍ସା ମଧ୍ୟ ଏହି ଟ୍ରଷ୍ଟ ମାଧ୍ୟମରେ କରିଛନ୍ତି । ଏହାସହ ରାଜ୍ୟର ଆଦିବାସୀ ଅଞ୍ଚଳକୁ ଯାଇ ସେମାନଙ୍କ ବିଭିନ୍ନ ସମସ୍ୟାର ସମାଧାନ କରୁଛନ୍ତି ଦିଲୀପ । ଖୁବଶୀଘ୍ର ସେ ଏକ ବୃଦ୍ଧାଶ୍ରମ ଆରମ୍ଭ କରିବାକୁ ଯୋଜନା କରିଛନ୍ତି । ଦିଲୀପଙ୍କ ଏହି ନିସ୍ବାର୍ଥପର ସେବା ପାଇଁ ତାଙ୍କ ନିକଟକୁ ପ୍ରଶଂସାର ସୁଅ ଛୁଟୁଛି ।
ଭୁବନେଶ୍ବରରୁ ଶତରୂପା ସାମନ୍ତରୟ, ଇଟିଭି ଭାରତ