ଭୁବନେଶ୍ବର: ଲୋକସେବା ଭବନରେ କୋରନା ଆକ୍ରାନ୍ତ ଚିହ୍ନଟ ହୋଇଛନ୍ତି । କୋରୋନାରେ ଆକ୍ରାନ୍ତ ପରେ ମଧ୍ୟ ଭବନରେ କାର୍ଯ୍ୟରତ ଥିଲେ କର୍ମଚାରୀ । ଫଳରେ ଅଧିକାଂଶ କର୍ମଚାରୀ ସଂକ୍ରମିତ ହେବା ନେଇ ଆଶଙ୍କା ରହିଛି । ବର୍ତ୍ତମାନ ସମୟରେ ମଧ୍ୟ ଅଧିକାଂଶ ସରକାରୀ କର୍ମଚାରୀ କୋରୋନାରେ ଆକ୍ରାନ୍ତ ହେଉଥିବାର ଦେଖାଯାଉଛି । ଏହି ଘଟଣା ନଜରକୁ ଆସିବା ପରେ ଅଫିସ ପରିଚାଳନା କିଭଳି ହେବ ଏନେଇ ଜିଏ ବିଭାଗ ଏକ ନୂଆ ନିର୍ଦ୍ଦେଶନାମା ଜାରି କରିଛି ।
ନୂଆ ନିର୍ଦ୍ଦେଶନାମା ଅନୁସାରେ ଯେକୌଣସି କର୍ମଚାରୀ କୋରୋନା ପଜିଟିଭ ଚିହ୍ନଟ ହେବା ପରେ ତୁରନ୍ତ ସେମାନେ ହୋମ୍ ଆଇସୋଲେସନରେ ରହିବେ । ସଂପୃକ୍ତ କର୍ମଚାରୀଙ୍କ ସଂସ୍ପର୍ଶରେ ଆସିଥିବା ଲୋକମାନଙ୍କର ତଥ୍ୟ ସଂଗ୍ରହ କରାଯିବ । କୌଣସି ସରକାରୀ କର୍ମଚାରୀ କୋରୋନା ପଜିଟିଭ ଚିହ୍ନଟ ହେବା ପରେ ସଂପୃକ୍ତ କର୍ମଚାରୀ କାର୍ଯ୍ୟ କରୁଥିବା କାର୍ଯ୍ୟାଳୟକୁ ସଂପୂର୍ଣ୍ଣ ବନ୍ଦ କରାଯିବ ନାହିଁ ବରଂ ଉକ୍ତ କର୍ମଚାରୀ 48 ଘଣ୍ଚା ମଧ୍ୟରେ ଯାଇଥିବା କାର୍ଯ୍ୟାଳୟର ନିର୍ଦ୍ଦିଷ୍ଟ ସ୍ଥାନକୁ ସିଲ୍ କରାଯିବ । ଯଦି କୌଣସି କାର୍ଯ୍ୟାଳୟରୁ ବହୁଳ ମାତ୍ରାରେ କୋରୋନା ପଜିଟିଭ ଚିହ୍ନଟ ହେଉଛନ୍ତି ତେବେ ଉକ୍ତ କାର୍ଯ୍ୟାଳୟକୁ ବିଶୋଧନ କରି 48 ଘଣ୍ଟା ପର୍ଯ୍ୟନ୍ତ ସଂପୂର୍ଣ୍ଣ ବନ୍ଦ ରଖାଯିବ ।