ଭୁବନେଶ୍ବର: ସବୁ କଳ୍ପନା ଜଳ୍ପନା ଓ ଆକଳନକୁ ପୁଣିଥରେ ଭୁଲ ପ୍ରମାଣିତ କଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ରାଜ୍ୟସଭା ପାଇଁ ଘୋଷଣା କରିଥିବା ୪ଜଣ ପ୍ରାର୍ଥୀଙ୍କ ଭିତରୁ କେବଳ ସୁଜିତ କୁମାରଙ୍କ ନାମ ହିଁ ଚର୍ଚ୍ଚାରେ ରହିଥିବା ବେଳେ ଅନ୍ୟ ତିନି ଜଣଙ୍କ ନାମ ଚକିତ କଲାଭଳି ଘୋଷଣା କରିଛନ୍ତି ନବୀନ । ସବୁଠାରୁ ଚର୍ଚ୍ଚାର ବିଷୟ ହେଉଛି ରାଜ୍ୟ ରାଜନୀତିରେ ଅଚିହ୍ନା ଥିବା ମମତା ମହାନ୍ତଙ୍କୁ ପ୍ରାର୍ଥୀ କରି ବଡ ସରପ୍ରାଇଜ ଦେଲେ ନବୀନ ।
ନିର୍ମାଣ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ସୁବାସ ସିଂଙ୍କ ସମେତ ମୁନ୍ନା ଖାଁ, ସୁଜିତ କୁମାର ଓ ମୟୂରଭଞ୍ଜର ମମତା ମହାନ୍ତଙ୍କୁ ମୁଖ୍ୟମନ୍ତ୍ରୀ ରାଜ୍ୟସଭାକୁ ପଢାଇବାକୁ ସ୍ଥିର କରିଛନ୍ତି । ରାଜ୍ୟସଭା ଆସନରେ ସୁବାସଙ୍କୁ ପ୍ରାର୍ଥୀ କରାଯିବାପରେ ତାଙ୍କ ଜାଗାରେ ବରିଷ୍ଠ ନେତା ତଥା ବ୍ରହ୍ମପୁରର ପୂର୍ବତନ ବିଧାୟକ ରମେଶ ଚନ୍ଦ୍ର ଚ୍ୟାଉପଟ୍ଟନାୟକଙ୍କୁ ନିର୍ମାଣ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଛି ।
ଦୀର୍ଘବର୍ଷ ଧରି ଦଳ ପାଇଁ କାର୍ଯ୍ୟ କରୁଥିବା ମୁନ୍ନା ଖାଁଙ୍କ ନାଁ ସବୁଥର ରାଜ୍ୟସଭା ପାଇଁ ଚର୍ଚ୍ଚା ହେଉଥିଲେ ମଧ୍ୟ ଚଳିତଥର କିନ୍ତୁ ଚର୍ଚ୍ଚାରେ ନ ଥିଲେ । ତେବେ ବିଳମ୍ବରେ ହେଲେ ମଧ୍ୟ ତାଙ୍କ ଆନୁଗତ୍ୟ ପରିଶ୍ରମର ଫଳ ଦେଇଛନ୍ତି ନବୀନ । ଏଥିସହ ରାଜ୍ୟସଭାରେ ଓଡ଼ିଶାରୁ ସଂଖ୍ୟାଲଘୁ ପ୍ରତିନିଧିତ୍ବ ଦେଇଛନ୍ତି । ରାଜ୍ୟ ସରକାରଙ୍କ ସଂଖ୍ୟାଲଘୁ ଓ ପଛୁଆ ବର୍ଗର ଉପଦେଷ୍ଟା ଭାବେ ମୁନ୍ନା ଖାଁ ବର୍ତ୍ତମାନ କାର୍ଯ୍ୟ କରୁଛନ୍ତି । ତେବେ ରାଜ୍ୟସଭା ଟିକେଟ ମିଳିବା ପରେ ମୁନ୍ନା ଖାଁ ଭାବବହ୍ଵଳ ହେବ ସହ ଖୁସି ବି ଜାହିର କରିଛନ୍ତି ।