ଭୁବନେଶ୍ବର: ସମଗ୍ର ଦେଶ ଆଜି ପାଳୁଛି ମହାତ୍ମା ଗାନ୍ଧୀଙ୍କ 150ତମ ଜନ୍ମ ଜୟନ୍ତୀ । ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାଣ୍ଟିଛନ୍ତି ସ୍ବଚ୍ଛତାର ବାର୍ତ୍ତା । ପ୍ଲାଷ୍ଟିକ ବର୍ଜନ କରି ପରିବେଶକୁ ସ୍ବଚ୍ଛ ଓ ସ୍ବାସ୍ଥ୍ୟକୁ ସୁସ୍ଥ ରଖିବାକୁ ଆହ୍ବାନ ଦେଇଛନ୍ତି ସେ।
ଟ୍ବିଟରରେ ଏହି ବାର୍ତ୍ତା ଦେଇ ମୁଖ୍ୟମନ୍ତ୍ରୀ ଗାନ୍ଧୀଜୀଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି । ସେ କହିଛନ୍ତି ଯେ, ‘ଗାନ୍ଧିଜୀ ସମଗ୍ର ମାନବ ଜାତି ପାଇଁ ଆଦର୍ଶ। ତାଙ୍କ ବିଚାରଧାରା ଆଜି ମଧ୍ୟ ଅନେକ ମହତ୍ତ୍ବ ରଖିଛି। ସେହି ବିଚାରଧାରାକୁ ପାଥେୟ କରି ଆସନ୍ତୁ, ଏକ ସ୍ବଚ୍ଛ ଓ ପ୍ଲାଷ୍ଟିକମୁକ୍ତ ସମାଜ ଗଠନ କରିବା।’
ଗାନ୍ଧିଜୀ ସବୁବେଳେ ସ୍ବଚ୍ଛତାକୁ ଗୁରୁତ୍ବ ଦେଉଥିଲେ । କାରଣ ଶାନ୍ତି ଓ ଉନ୍ନତି ଲାଗି ଏହା ସବୁଠୁ ମହତ୍ବପୂର୍ଣ୍ଣ ଦିଗ । ତେଣୁ ଆଜିର ଦିନରେ ସମସ୍ତେ ପରିବେଶକୁ ସ୍ବଚ୍ଛ ଓ ସୁସ୍ଥ ରଖିବା ଉଦ୍ଦେଶ୍ୟରେ ପ୍ଲାଷ୍ଟିକ ବର୍ଜନ ନେଇ ଶପଥ ନେବାକୁ ମୁଖ୍ୟମନ୍ତ୍ରୀ ଆହ୍ବାନ ଦେଇଛନ୍ତି।
ଭୁବନେଶ୍ବରରୁ ଅଜିତ ଦାସ, ଇଟିଭି ଭାରତ