୩ ମାସ ଭିତରେ ସଂପୂର୍ଣ୍ଣ ହେବ MSME ଗଣନା ପ୍ରକ୍ରିୟା

ରାଜ୍ୟରେ ଅନୁଷ୍ଠିତ ହେବ ଏମ୍ଏସ୍ଏମ୍ଇ ଗଣନା । ୩ ମାସ ଭିତରେ ସମ୍ପୂର୍ଣ୍ଣ ହେବ ଗଣନା ପ୍ରକ୍ରିୟା । ଅଧିକ ପଢନ୍ତୁ...

ଭୁବନେଶ୍ବର:ରାଜ୍ୟରେ ଏମ୍ଏସ୍ଏମ୍ଇ ଗଣନା କାର୍ଯ୍ୟକ୍ରମ କରାଯିବ । ଏହା ଆସନ୍ତା ଅକ୍ଟୋବର ମାସଠାରୁ ଆରମ୍ଭ ହୋଇ ତିନି ମାସ ଯାଏଁ ଚାଲିବ । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ବୀକୃତି ପ୍ରଦାନ କରିଛନ୍ତି । ଦୀର୍ଘ ୧୫ ବର୍ଷ ପରେ ଦେଶର ପ୍ରଥମ ରାଜ୍ୟ ଭାବେ ଓଡ଼ିଶା ଏହି ସର୍ଭେ କରୁଥିବା ଅଣୁ, କ୍ଷୁଦ୍ର, ମଧ୍ୟମ ଉଦ୍ୟୋଗ ବିଭାଗ ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ ଜଣାଇଛନ୍ତି । ଇତିମଧ୍ୟରେ ମାଷ୍ଟର ଟ୍ରେନରମାନଙ୍କ ତାଲିମ୍ କାର୍ଯ୍ୟକ୍ରମ ଆରମ୍ଭ କରାଯାଇଛି । ଗଣନାକାରୀ ଭାବେ ଗଣଶିକ୍ଷା ବିଭାଗର ୧୫୦୦ ଶିକ୍ଷକଙ୍କୁ ଏହି କାର୍ଯ୍ୟରେ ନିୟୋଜନ କରାଯିବ ।

୩ ମାସ ଭିତରେ ସଂପୂର୍ଣ୍ଣ ହେବ ଏମ୍ଏସ୍ଏମ୍ଇ ଗଣନା ପ୍ରକ୍ରିୟା

ଏହି ଗଣନା ନିମନ୍ତେ ନିର୍ଦ୍ଦିଷ୍ଟ ପ୍ରଶ୍ନବଳୀ ସହିତ ଆବଶ୍ୟକୀୟ ତଥ୍ୟ ସଂଗ୍ରହ ପାଇଁ ଫର୍ମାଟ ପ୍ରସ୍ତୁତ କରାଯାଇଛି । ପ୍ରାୟ ୫ ଲକ୍ଷ ୟୁନିଟ ତଥ୍ୟ ସଂଗ୍ରହ କରାଯିବାକୁ ଧାର୍ଯ୍ୟ କରାଯାଇଛି । ଏହା ଏକାଥରକେ ରାଜ୍ୟର ୩୧୪ଟି ବ୍ଲକ୍ ଏବଂ ୧୨୬ଟି ପୌରାଞ୍ଚଳରେ ସଂଚାଳନ କରାଯିବ ରାଜ୍ୟର ଆର୍ଥିକ ବିକାଶ ଓ ଯୋଜନା ପ୍ରଣୟନ ନିମନ୍ତେ ଏହି ତଥ୍ୟ ଅଧୁକ ଗୁରୁତ୍ୱ ବହନ କରୁଥିବା ହେତୁ ଏହି ପ୍ରକ୍ରିୟାକୁ ନିର୍ଭୁଲ ଏବଂ ସଠିକ୍ ଭାବେ ପରିଚାଳନା କରିବା ଉପରେ ଅଧିକ ଦୃଷ୍ଟି ନିକ୍ଷେପ କରାଯାଉଥିବା ସଚିବ ସାହୁ ପ୍ରକାଶ କରିଛନ୍ତି ।ଏଥିପାଇଁ ରାଜ୍ୟ ସରକାରଙ୍କ ଦ୍ଵାରା ୧୫ କୋଟି ଟଙ୍କାର ବଜେଟ୍ ପ୍ରସ୍ତୁତ କରାଯାଇଛି । ସଂଗୃହୀତ ହେବାକୁ ଥିବା ତଥ୍ୟରେ ଉଦ୍ୟୋଗର ଅବସ୍ଥିତି ଠାରୁ ଆରମ୍ଭ କରି ତା’ର ପ୍ରକାର, ଆକାର ଠିକଣା, ସତ୍ତ୍ୱଧକାରୀଙ୍କ ସବିଶେଷ ବିବରଣୀ, ସରକାରଙ୍କ ଠାରୁ ଆର୍ଥିକ ସହଯୋଗ ଯଦି ପାଇଥାନ୍ତି ତା’ର ସମ୍ପୂର୍ଣ୍ଣ ବିବରଣୀ ତଥା ଉଦ୍ୟୋଗୀର ସାମ୍ପ୍ରତିକ ଅବସ୍ଥା, ସଫଳତା, ବିଫଳତା, ଉଦ୍ୟୋଗୀ ସମ୍ମୁଖୀନ ହେଉଥିବା ସମସ୍ୟା ଇତ୍ୟାଦି ସମ୍ପର୍କରେ ଅଧିକ ତଥ୍ୟ ଜଣାପଡ଼ିବ । ଏହି କାର୍ଯ୍ୟକ୍ରମକୁ ସଂଚାଳନ କରିବା ପାଇଁ ଶିଳ୍ପ ନିର୍ଦ୍ଦେଶାଳୟ କଟକକୁ ନୋଡାଲ ଏଜେନ୍ସି ଭାବେ ମନୋନୀତ କରାଯାଇଛି ।

ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ