ଭୁବନେଶ୍ବର: ଆଖି ବୁଜିଛନ୍ତି ବିଜେଡି ବରିଷ୍ଠ ନେତା ପ୍ରଦୀପ ମହାରଥୀ । ତାଙ୍କ ବିୟୋଗରେ ରାଜ୍ୟ ରାଜନୀତିରେ ଏକ ଅପୂରଣୀୟ କ୍ଷତି ସୃଷ୍ଟି ହୋଇଥିବା ବେଳେ ମହାରଥୀଙ୍କ ମୃତ୍ୟୁକୁ ନେଇ ପୁଣି ଚର୍ଚ୍ଚାରେ ଆସିଛନ୍ତି କେନ୍ଦ୍ରାପଡା ସାଂସଦ ଅନୁଭବ ମହାନ୍ତି । କଥା ଏପରି କି, ପ୍ରଦୀପ ମହାରଥୀଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେବା ପରେ ଆରମ୍ଭ ହୋଇଥିଲା ବିଭିନ୍ନ କଳ୍ପନା ଜଳ୍ପନା । ଏମିତିରେ ତାଙ୍କ ମୃତ୍ୟୁ ହେବା ପୂର୍ବରୁ କିମ୍ବା ଏନେଇ ତାଙ୍କ ପରିବାର ଓ ଡାକ୍ତରଖାନା କର୍ତ୍ତୃପକ୍ଷଙ୍କ ପକ୍ଷରୁ କିଛି ସ୍ପଷ୍ଟ ହେବା ପୂର୍ବରୁ ଶୋକ ବାର୍ତ୍ତା ଦେଇ ନିଜ ଭେରିଫାଏଡ ଫେସବୁକ ଓ ଟ୍ବିଟର ଆକାଉଣ୍ଟରେ ପୋଷ୍ଟ କରିଥିଲେ ଅନୁଭବ ।
ଏହି ପୋଷ୍ଟରେ ସେ ଲେଖିଥିଲେ କି ପ୍ରଦୀପ ମହାରଥୀଙ୍କ ବିୟୋଗକୁ ସେ ସହଜରେ ଗ୍ରହଣ କରିପାରୁ ନାହାନ୍ତି । ଜଣେ ପ୍ରଭାବଶାଳୀ ଓ ମାର୍ଗଦର୍ଶକ ନେତା ଭାବେ ସେ ସବୁବେଳେ ସତ୍ୟ ଉପରେ ବିଶ୍ବାସ ରଖନ୍ତି । ତେବେ ମହାରଥୀଙ୍କ ବିୟୋଗ କଥା ସ୍ପଷ୍ଟ ହେବା ପୂର୍ବରୁ ଅନୁଭବଙ୍କ ଏପରି ପୋଷ୍ଟକୁ ନେଇ ଅନେକ ୟୁଜର୍ସ ଆପତ୍ତି ଜଣାଇବାରୁ ନିଜ ପୋଷ୍ଟକୁ ତୁରନ୍ତ ଆକାଉଣ୍ଟରୁ ହଟାଇବା ସହ କ୍ଷମା ପ୍ରାର୍ଥନା କରିଥିଲେ ଅନୁଭବ । କ୍ଷମା ପ୍ରାର୍ଥନା କରି ସେ କହିଥିଲେ କି ସେ ଏହି ଖବର ନେଇ ବର୍ତ୍ତମାନ ସୁଦ୍ଧା ସ୍ପଷ୍ଟ ନାହାନ୍ତି । ତେବେ ପ୍ରଭୁ ଜଗନ୍ନାଥ କରନ୍ତୁ ମହାରଥୀ ଦୀର୍ଘାୟୁ ହୁଅନ୍ତୁ ଓ ମୋ ଶୋକ ବାର୍ତ୍ତା ମିଛ ପ୍ରମାଣିତ ହେଉ ।