ରାଜଧାନୀରେ ‘ମୋ ସରକାର’ ଫେଲ, ଫୁଟପାଥରେ ପ୍ରସବ କଲେ ମହିଳା

ଯୋଜନା ଯେଉଁଠୁ ଆରମ୍ଭ ଅବହେଳା ସେଇଠି । ରାଜଧାନୀର କ୍ୟାପିଟାଲ ହସ୍ପିଟାଲ ବାହାର ଫୁଟପାଥରେ ପ୍ରସବ କରିଛନ୍ତି ମହିଳା । ଏହାର ଭିଡିଓ ଏବେ ଭାଇରାଲ ହୋଇଛି । ରାଜ୍ୟର ପ୍ରମୁଖ ହସ୍ପିଟାଲରେ ଏଭଳି ଅବହେଳା ‘ମୋ ସରକାର’ ଯୋଜନାକୁ ସମ୍ପୁର୍ଣ୍ଣ ବିଫଳ କରିଦେଇଛି ।

ଭୁବନେଶ୍ବର: ଫୁଟପାଥରେ ପ୍ରସବ କଲେ ମହିଳା । ଏହି ଘଟଣା ଖୋଦ ରାଜଧାନୀ କ୍ୟାପିଟାଲ ହସ୍ପାଟାଲର ବାହାରେ ଦେଖିବାକୁ ମିଳିଛି । ଡାକ୍ତରଙ୍କ ଅଣଦେଖା ଓ ମନମାନୀ ଯୋଗୁଁ ଯନ୍ତ୍ରଣା ସହି ନପାରି ରାସ୍ତାକଡରେ ମହିଳା ଜଣଙ୍କ ପ୍ରସବ କରିଥିବା ଦେଖାଦେଇଛି । ରାଜ୍ୟର ପ୍ରମୁଖ ହସ୍ପିଟାଲରେ ଏଭଳି ଅବହେଳା ‘ମୋ ସରକାର’ ଯୋଜନାକୁ ସମ୍ପୁର୍ଣ୍ଣ ବିଫଳ କରିଦେଇଛି ।

ସୂଚନା ଅନୁଯାୟୀ ଶୁକ୍ରବାର ରାତି ପ୍ରାୟ 8 ଟା। ପାନା ମୁର୍ମୁ ନାମକ ଜଣେ ମହିଳା ଗର୍ଭଯନ୍ତ୍ରଣାରେ କ୍ୟାପିଟାଲ ହସ୍ପିଟାଲକୁ ଆସିଥିଲେ। ହେଲେ ଏଠାରେ ଡାକ୍ତର ଟିକେଟ ପାଇଁ କହି ଅଣଦେଖା କରିଦେଇଥିଲେ । ଏପଟେ ଗର୍ଭ ଯନ୍ତ୍ରଣାରେ ସହି ନପାରି ପାନା ସେହି ରାସ୍ତାରେ ହିଁ ପ୍ରସବ କରିଥିଲେ।

ଅଭିଯୋଗ ହୋଇଛି ଯେ, ଖୋଦ ରାଜଧାନୀର ଏତେ ବଡ ଡାକ୍ତରଖାନାରେ ରୋଗୀ ଦେଖିବାକୁ ଡାକ୍ତର ନାହାନ୍ତି । ୬୦ ରୋଗୀକୁ ମାତ୍ର 2 ଡାକ୍ତର । ଏଥିରୁ ଏଠାକାର ସ୍ବାସ୍ଥ୍ୟସେବାର ବାସ୍ତବ ସ୍ଥିତି ଅନୁମେୟ । ଏପଟେ କିନ୍ତୁ ବହୁ ସଫେଇ ଦେଇ ଦୋଷ ଛଡେଇ ଦେଇଛନ୍ତି ମେଡିକାଲ ଅଧିକ୍ଷକ ।

ରାଜ୍ୟରେ ‘ମୋ ସରକାର’ ଅଭିଯାନ କ୍ୟାପିଟାଲ ହସ୍ପିଟାଲରୁ ଆରମ୍ଭ ହୋଇଥିଲା । ହେଲେ ଏଠାକାର ଏଭଳି ସ୍ଥିତି ଏବେ ରାଜ୍ୟର ଅନ୍ୟ ହସ୍ପିଟାଲର ରୋଗୀ ସେବା ନେଇ ପ୍ରଶ୍ନବାଚୀ ସୃଷ୍ଟି କରିଛି ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ