Budget Session: ପେଟ୍ରୋଲ ଡିଜେଲ ଉପରୁ ଭ୍ୟାଟ ଟିକସ ହ୍ରାସ ପାଇଁ ଉଠିଲା ଦାବି

ରାଜ୍ୟରେ ତୈଳ ଦର ଆକାଶ ଛୁଆଁ ହୋଇଥିବା ବେଳେ ହନ୍ତସନ୍ତ ସାଧାରଣଜନତା । ଏହି ପ୍ରସଙ୍ଗ ଆଜି ବିଧାନସଭାରେ ମଧ୍ୟ ଉଠିଛି । ଅଧିକ ପଢନ୍ତୁ

ଭୁବନେଶ୍ବର:ରାଜ୍ୟରେ ତୈଳଦର ଆକାଶ ଛୁଆଁ ହୋଇଥିବା ବେଳେ ଆଜି(ଗୁରୁବାର) ଷୋଡ଼ଶ ବିଧାନସଭା ଅଧିବେଶନର ଷଷ୍ଠ ଦିବସରେ ଉଠିଛି ଏହି ପ୍ରସଙ୍ଗ । ଗୃହ ଚାଲିଥିବା ବେଳେ ଶୂନ୍ୟକାଳରେ ଅତ୍ୟାବଶ୍ୟକ ସାମଗ୍ରୀର ଦରଦାମ ବୃଦ୍ଧି ପ୍ରସଙ୍ଗ ଉଠାଇଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା । ଏହି ପ୍ରସଙ୍ଗ ଉଠାଇ ସେ ରାଜ୍ୟ ସରକାରଙ୍କୁ ଘେରିଛନ୍ତି । ପେଟ୍ରୋଲ ଡିଜେଲ ଉପରେ ଭ୍ୟାଟ ଟ୍ୟାକ୍ସ ହ୍ରାସ କରିବାକୁ ଦାବି କରିବା ସହ ରାଜ୍ୟରେ ଦରଦାମ ଯେଉଁଭଳି ବୃଦ୍ଧି ହେଉଛି ତାହା ଅତ୍ୟନ୍ତ ଚିନ୍ତାଜନକ ବିଷୟ ବୋଲି ସେ କହିଛନ୍ତି ।

ଖାଉଟିଙ୍କ ଉପରେ ବୋଝ ପଡୁଛି । ଗତ ୨୨ ମାର୍ଚ୍ଚରେ ପ୍ରଥମ କରି ପେଟ୍ରୋଲ ବଢ଼ିଥିଲା । ହେଲେ ଗତ ୧୦ ଦିନ ମଧ୍ୟରେ ୯ ଥର ବୃଦ୍ଧି ପାଇଛି । ଖାଲି ଭୁବନେଶ୍ବର ନୁହେଁ ରାଜ୍ୟର ବିଭିନ୍ନ ସ୍ଥାନରେ ରେଟ ବୃଦ୍ଧି ପାଇଛି । ଭ୍ୟାଟ ଟିକସ କମେଇବାକୁ ଦାବି କରିଛନ୍ତି ସାଲୁଜା । ଗୃହିଣୀ ମାନେ ମଧ୍ୟ ରନ୍ଧନ ଗ୍ୟାସ ପାଇଁ ଚିନ୍ତାରେ ଅଛନ୍ତି । ରାଜ୍ୟ ସରକାର ଭ୍ୟାଟ କମାଇବାକୁ ଗୃହରେ ଦାବି କରିଛନ୍ତି ସାଲୁଜା ।

ତେବେ ସୂଚନା ଥାଉ କି ଭୁବନେଶ୍ବରରେ ଏବେ ପେଟ୍ରୋଲ ଲିଟର ପିଛା ୧୦୮ ଟଙ୍କା ୬୫ ପଇସା ଏବଂ ଡିଜେଲ ଲିଟର ପିଛା ୯୮ ଟଙ୍କା ୪୨ ପଇସାରେ ପହଞ୍ଚିଛି । ପେଟ୍ରୋଲ ଓ ଡିଜେଲ ବୃଦ୍ଧି ପରେ ଅତ୍ୟାବଶ୍ୟକ ସାମଗ୍ରୀ ମଧ୍ୟ ବୃଦ୍ଧି ପାଉଛି । ଏଥିରେ ହନ୍ତସନ୍ତ ହେଉଛନ୍ତି ସାଧାରଣ ଜନତା । କିଛି ଦିନ ପୂର୍ବେ ୫ଟି ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବାରୁ ତୈଳ ଦର ଦୀର୍ଘ ୪ ମାସ ଯାଏଁ ଅପରିବର୍ତ୍ତିତ ରହିଥିଲା । ହେଲେ ନିର୍ବାଚନ ଫଳାଫଳ ପ୍ରକାଶ ପାଇବା ସହ ସରକାର ଗଠନ ପରେ ଗତ ୨୨ ତାରିଖରୁ କମ୍ପାନୀମାନେ ତୈଳ ଦର ବଢାଇ ଚାଲିଛନ୍ତି ।

ଭୁବନେଶ୍ବରରୁ ସଞ୍ଜୀବ କୁମାର ରାୟ ଓ ରୁଦ୍ର ନାରାୟଣ ଦାସ, ଇଟିଭି ଭାରତ