ଭୁବନେଶ୍ବର: ସାରା ଦେଶ ପାଳୁଛି ବିଶ୍ବ ପଖାଳ ଦିବସ । ଓଡ଼ିଆଙ୍କ ପ୍ରିୟ ଖାଦ୍ୟ ପଖାଳର ସ୍ଵାଦ ସମସ୍ତଙ୍କ ମୁହଁରେ । ମୁଖ୍ୟମନ୍ତ୍ରୀଙ୍କଠୁ କେନ୍ଦ୍ରମନ୍ତ୍ରୀ, ନେତାଙ୍କ ଠାରୁ ଅଭିନେତା, ଯନ୍ତ୍ରୀଙ୍କ ଠାରୁ ଆରମ୍ଭ କରି ମନ୍ତ୍ରୀ ସମସ୍ତେ ପାଳୁଛନ୍ତି ପଖାଳ ଦିବସ । ପଖାଳ ଖାଇବାର ଫଟୋ ଓ ଭିଡିଓ ପୋଷ୍ଟ କରି ସମସ୍ତେ ଦେଉଛନ୍ତି ପଖାଳ ଦିବସର ଶୁଭେଚ୍ଛାର ବାର୍ତ୍ତା ।
ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, IAS ଅଫିସର ଅରବିନ୍ଦ ପାଢୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିଜେପି ସଭାପତି ସମୀର ମହାନ୍ତି, କଂଗ୍ରେସ ନେତା ସୁର ରାଉତରାୟ ଶୁଭେଚ୍ଛା ବାର୍ତ୍ତାରେ ଯୋଡି ହୋଇଯାଇଛନ୍ତି । ସେହିପରି କଟକ ଡିସିପି ପ୍ରତୀକ ସିଂହ, OTDC ଅଧ୍ୟକ୍ଷା ଶ୍ରୀମୟୀ ମିଶ୍ର, ଅଭିନେତା ତଥା ସାଂସଦ ଅନୁଭବ ମହାନ୍ତି, ବିଧାୟକ ପ୍ରୀତି ରଞ୍ଜନ ଘଡେଇ, ଅଭିନେତ୍ରୀ ବର୍ଷା ପ୍ରିୟଦର୍ଶନୀ, ସମରେଶ ରାଉତରାୟ ପଖାଳ ଦିବସରେ ଶୁଭେଚ୍ଛା ଜଣାଇଛନ୍ତି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପଖାଳ ମୋର ପସନ୍ଦ କହିବା ସହ ଏହି ଦିବସରେ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଛନ୍ତି । ଏଥିସହ ପଖାଳ ଖାଇବାର ଏକ ଭିଡିଓ ଜାରି କରିଛନ୍ତି ମୁଖ୍ୟମନ୍ତ୍ରୀ ।
ସେପରି, ଟ୍ବିଟରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲେଖିଛନ୍ତି ଯେ, 'ଆମ ଓଡ଼ିଆ ଲୋକଙ୍କର ପ୍ରିୟ ଖାଦ୍ୟ ‘ପଖାଳ’ ଖାଇ ଅତ୍ୟନ୍ତ ଆନନ୍ଦିତ । ପଖାଳ ମୋର ଅତି ପ୍ରିୟ । ପଖାଳ ସାଙ୍ଗରେ ଅନ୍ୟାନ୍ୟ ସ୍ବାଦିଷ୍ଟ ଓଡ଼ିଆ ବ୍ୟଞ୍ଜନର ସ୍ବାଦ ସତରେ ନିଆରା ।'