ଭୁବନେଶ୍ବର: ବାଲେଶ୍ବର ପରେ ବ୍ରାଉନସୁଗାର ବେପାରର ହବ୍ ପାଲଟିଲାଣି ରାଜଧାନୀ । ହଳଦୀ ପଡିଆ ପରେ ଏବେ ସାଲିଆ ସାହିରେ ଚାଲିଛି ବ୍ରାଉନସୁଗାରର ଖୁଲମ୍ ଖୁଲା ବେପାର । ଏନେଇ ସୁରାକ୍ ପାଇ ପୋଲିସ ଲକ୍ଷାଧିକ ଟଙ୍କାର ଧଳା ଜହର ଜବତ କରିବା ସହ ୨ ଅଭିଯୁକ୍ତଙ୍କୁ ଗିରଫ କରିଛି ।
ଆଜି(ମଙ୍ଗଳବାର) ଅବକାରୀ ବିଭାଗ ଏବଂ କମିଶନରେଟ ପୋଲିସର କ୍ୟୁଏଟି ଟିମ୍ ମିଳିତ ଭାବେ ସାଲିଆ ସାହିରେ ଚଢାଉ କରିଥିଲା । ଏହି ସମୟରେ ଅବକାରୀ ବିଭାଗ ନର୍ମଦା ସାହୁ ନାମକ ଜଣେ ମହିଳାଙ୍କୁ ଗିରଫ କରିବା ସହ କୁଖ୍ୟାତ ପାଉ ଡିଲର୍ ରାଜେନ୍ଦ୍ର ଓରଫ୍ ରାଜାକୁ ଗିରଫ କରିଛି କ୍ୟୁଏଟି ଟିମ୍ । ତେବେ ଅଭିଯୁକ୍ତ ନର୍ମଦା ନିକଟରୁ ପୋଲିସ ସାଢେ ୯ ଲକ୍ଷ ଟଙ୍କାର ୯୫ ଗ୍ରାମ ବ୍ରାଉନସୁଗାର ଜବତ କରି ଥିବାବେଳେ ୫ଲକ୍ଷ ଟଙ୍କାର ୫୦ ଗ୍ରାମ ବ୍ରାଉନସୁଗାର ଜବତ କରିଛି ।
ଉଭୟ ଖୋର୍ଦ୍ଧାର ବେପାରୀଙ୍କ ଠାରୁ ଧଳା ଜହର ଆଣି ପୁଡିଆ ପିଛା ୬୦୦ ରୁ ୭୦୦ ଟଙ୍କାରେ ବିକ୍ରି କରୁଥିଲେ । ତେବେ ବିଭିନ୍ନ କୋର୍ଡ ଓ୍ବାର୍ଡରେ ବିକ୍ରି କରୁଥିଲେ ବୋଲି ସୂଚନା ଦେଇଛନ୍ତି ଏକ୍ସାଇଜ ଇନସ୍ପେକ୍ଟର ବିକାଶ ନାୟକ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ