ଭୁବନେଶ୍ବର:କଳାହାଣ୍ଡି ଜିଲ୍ଲା ଭବାନୀପାଟଣାରେ ପ୍ରତିଷ୍ଠା ହେବ ମେଡିକାଲ କଲେଜ । ଏଥିପାଇଁ ମୋଟ ୩୨୫ କୋଟି ଟଙ୍କାର ବ୍ୟୟବରାଦ ହୋଇଥିବାବେଳେ କେନ୍ଦ୍ର ଓ ରାଜ୍ୟ ୬୦/40 ଅନୁପାତରେ ଖର୍ଚ୍ଚ ବହନ କରିବେ । ଲୋକସଭାରେ କଳାହାଣ୍ଡି ସାଂସଦ ବସନ୍ତ ପଣ୍ଡାଙ୍କ ଉତ୍ତରରେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଲିଖିତରେ ଏହି ସ୍ପଷ୍ଟୀକରଣ ରଖାଯାଇଛି । ସାଂସଦ ପଣ୍ଡା ପଚାରିଥିବା ଅଣତାରକା ପ୍ରଶ୍ନର ଉତ୍ତରରେ ଲିଖିତରେ ଏହି ବିବରଣୀ ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟ ରାଜ୍ୟ ମନ୍ତ୍ରୀ ଡା.ଭାରତୀ ପ୍ରବୀଣ ପାଓ୍ବର ।
ଭବାନୀପାଟଣାରେ ଏକ ମେଡିକାଲ କଲେଜକୁ ଅନୁମୋଦନ ମିଳିଛି କି ଓ ଯଦି ମିଳିଛି କେବେ ସୁଦ୍ଧା ଏହାର ନିର୍ମାଣ କାର୍ଯ୍ୟ ଆରମ୍ଭ ହେବ, ସେ ବାବଦରେ ପ୍ରଶ୍ନ କରିଥିଲେ ସ୍ଥାନୀୟ ସାଂସଦ ବସନ୍ତ ପଣ୍ଡା । ଉତ୍ତରରେ କେନ୍ଦ୍ର ସ୍ବାସ୍ଥ୍ୟ ରାଜ୍ୟମନ୍ତ୍ରୀ ସୂଚନା ଦେଇଛନ୍ତି, ଅନୁମୋଦିତ ମେଡିକାଲ ପାଇଁ ମୋଟ ୩୨୫ କୋଟି ଖର୍ଚ୍ଚ ବରାଦ ହୋଇଥିବାବେଳେ କେନ୍ଦ୍ର ପକ୍ଷରୁ ୬୦ ପ୍ରତିଶତ ଅର୍ଥାତ ୧୯୫ କୋଟିର ଅନୁଦାନ ମିଳିବାକୁ ଥିବାବେଳେ ବର୍ତ୍ତମାନ ସୁଦ୍ଧା ୮୧.୬୨ ଟଙ୍କା କେନ୍ଦ୍ର ପକ୍ଷରୁ ପ୍ରଦାନ ସରିଛି । ସେହିପରି ପ୍ରସ୍ତାବିତ ପ୍ରକଳ୍ପର ଢାଞ୍ଚା ଓ ରୂପରେଖ ରାଜ୍ୟ ସରକାର କ୍ରିୟାନ୍ବୟନ କମିଟି ଦ୍ବାରା ଧାର୍ଯ୍ୟ କରିବେ । ସେହିପରି ପ୍ରକଳ୍ପର ଆରମ୍ଭ ମଧ୍ୟ ରାଜ୍ୟ ସରକାରଙ୍କ ପ୍ରତ୍ୟକ୍ଷ ତତ୍ବାବଧାନରେ ହେବା ନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି ।