ଭୁବନେଶ୍ବର: ଏମସିଏଲରେ ଓଡ଼ିଆ ପିଲାଙ୍କୁ ନିଯୁକ୍ତି ମିଳୁନି । ପରିସ୍ଥିତି ଏମିତି ହେଲାଣି ଯେ, ଓଡ଼ିଆ ପିଲାଙ୍କୁ ଅବହେଳା କରାଗଲେ ସେଠାରେ ରକ୍ତପାତ ହେବ । ବୁଧବାର ବିଧାନସଭାର ଶୂନ୍ୟକାଳରେ ପୂର୍ବତନ ବାଚସ୍ପତି ତଥା ଝାରସୁଗୁଡା ବିଧାୟକ କିଶୋର ମହାନ୍ତି ସତର୍କ କରାଇ ଦେଇଛନ୍ତି । ଏହି କଥାରେ ତାଙ୍କ ସହ ସରକାରୀ ଦଳର ଉପମୁଖ୍ୟ ସଚେତକ ରୋହିତ ପୂଜାରୀ ଓ ତାଳଚେର ବିଧାୟକ ସ୍ବର ମିଳାଇଥିଲେ ।
ଓଡ଼ିଆଙ୍କୁ ହତାଦର କରୁଛି ଏମସିଏଲ
ଗତ 24 ତାରିଖରେ ଏମସିଏଲରେ ହୋଇଥିବା ଏକ ଇଣ୍ଟରଭିୟ୍ୟୁରେ 2373 ଜଣ ଛାତ୍ରଛାତ୍ରୀ ଉତ୍ତୀର୍ଣ୍ଣ ହୋଇଛନ୍ତି । କିନ୍ତୁ ସେ ମଧ୍ୟରେ ସର୍ବାଧିକ 10 ଜଣ ଓଡ଼ିଆ ପିଲା ଅଛନ୍ତି । ଜମି ହରାଇଥିବା ଲୋକେ ଏଯାଏଁ ନିଯୁକ୍ତି ପାଇନାହାନ୍ତି । ଲୋକେ ଆନ୍ଦୋଳନ କଲେ ଦିଲ୍ଲୀରୁ ଜିଲ୍ଲାପାଳଙ୍କୁ ଫୋନ ଆସୁଛି ଆନ୍ଦୋଳନ ବନ୍ଦ କରିବାକୁ । ଏମସିଏଲ କାର୍ଯ୍ୟାଳୟରେ ଓଡ଼ିଆ ଭାଷାର ବ୍ୟବହାର ହେଉନି । ଏହା ଓଡ଼ିଆ ଭାଷା ଓ ରାଜ୍ୟ ପାଇଁ ଅପମାନ ବୋଲି କିଶୋର ଅଭିଯୋଗ କରିଥିଲେ ।