ଭୁବନେଶ୍ବର: ସ୍ମାର୍ଟସିଟିରେ ନୂଆ ସମ୍ଭାବନା । ପ୍ରଦୂଷଣ ରୋକିବ ଆବର୍ଜନାରୁ ପ୍ରସ୍ତୁତ ଖତ । ରାଜଧାନୀ ଭୁବନେଶ୍ବରରେ କାର୍ଯ୍ୟକ୍ଷମ ହୋଇଛି ପ୍ରଥମ ମାଇକ୍ରୋ କମ୍ପୋଷ୍ଟିଙ୍ଗ୍ ସେଣ୍ଟର(MCC)। ବିଏମସି ଅଧୀନରେ ପରିଚାଳିତ ଏହି ଏମସିସିରେ ଦୈନିକ 5 TPD ଆବର୍ଜନାରୁ ପ୍ରସ୍ତୁତ ହେବ ଖତ । ଆବର୍ଜନାରୁ ପୃଥକୀକରଣ ହୋଇ ଯେଉଁ ଜୈବିକ ଖତ ପ୍ରସ୍ତୁତ ହେବ ତାହା ପରିବେଶକୁ ସୁସ୍ଥ ରଖିବା ସହିତ ଫସଲ ପାଇଁ ବେଶ ଉପଯୋଗୀ ହେବ । ୩ଟି ଜୋନରେ ଆରମ୍ଭ ହେବ ପ୍ରାୟ ୪୩ଟି ଏମସିସି । ସବୁଠୁ ବଡ କଥା ହେଉଛି ଏମସିସିର ପରିଚାଳନା ଦାୟିତ୍ବ ସ୍ବୟଂ ସହାୟକ ଗୋଷ୍ଠୀଙ୍କ ହାତରେ ଦିଆଯାଇଛି ଯାହାର ନୀତିଗତ ନିଷ୍ପତ୍ତି ନେଇଛି ବିଏମସି ।
ଏ ହେଉଛି ଭୁବନେଶ୍ବର ଝାରପଡା ୱାର୍ଡ ନଂ ୩୨ ଓ ୩୩ରେ କାର୍ଯ୍ୟକ୍ଷମ ହୋଇଥିବା ପ୍ରଥମ ମାଇକ୍ରୋ କମ୍ପୋଷ୍ଟିଙ୍ଗ ସେଣ୍ଟର। ପ୍ରାୟ ୧.୫ ଏକର ପରିମିତ ଜାଗାରେ ତିଆରି ହୋଇଛି ଏମସିସି । ପାଖାପାଖି ଦେଢ଼ ବର୍ଷ ତଳେ ଏମିତି ଏକ ଅଭିନବ ଯୋଜନାର ପରିକଳ୍ପନା କରିଥିଲା BMC । ହେଲେ ଜମି ଅଧିଗ୍ରହଣ ଠାରୁ ଆରମ୍ଭ କରି ବିଭିନ୍ନ ପ୍ରଶାସନିକ କାର୍ଯ୍ୟଶୈଳୀ ଓ ମହାମାରୀ କୋରୋନା କାରଣରୁ ପ୍ରକଳ୍ପ ଅଟକି ଥିଲା। ତେବେ ଧାର୍ଯ୍ୟ କରାଯାଇଥିବା ସମୟର ୭ରୁ ୮ ମାସ ପରେ ପ୍ରାୟ ୪୮ ଲକ୍ଷ ଟଙ୍କା ବ୍ୟୟରେ ଆରମ୍ଭ ହୋଇଛି ଏମସିସି । ରାଜଧାନୀର ଅଳିଆ ଆବର୍ଜନା ପରିଚାଳନା ପାଇଁ ନାକେଦମ ହେଉଥିବା ବିଏମସି ଏବେ ଏମସିସି ସହାୟତାରେ ତାର ସୁପରିଚାଳନା କରିପାରିବ।