ଭୁବନେଶ୍ବର: ରାଜଧାନୀକୁ ଧିରେ ଧିରେ ଗ୍ରାସିବାରେ ଲାଗିଛି କୋରୋନା ସଂକ୍ରମଣ । ଏମିତିରେ ବଢୁଥିବା ସଂକ୍ରମଣ ଗୋଷ୍ଠୀ ସଂକ୍ରମଣକୁ ଅଗ୍ରସର ହେଉଥିବା ନେଇ ସନ୍ଦେହ ପ୍ରକାଶ ପାଇଛି । ଅନେକ ମାମଲା ହୋମ କ୍ବାରେଣ୍ଟାଇନ ଓ କ୍ବାରେଣ୍ଟାଇନ କେନ୍ଦ୍ରରୁ ଚିହ୍ନଟ ହୋଇଥିବା ବେଳେ ସ୍ଥାନୀୟ ସଂକ୍ରମଣ ସଂଖ୍ୟା ମଧ୍ୟ ସମୟ ସହ ବଢୁଥିବାର ଦେଖାଯାଉଛି । ସେପଟେ ଶନିବାର ରାଜଧାନୀରେ 87ଟି ନୂଆ ମାମଲା ସାମ୍ନାକୁ ଆସିଛି ।
ଚିହ୍ନଟ ମାମଲାରୁ 41 ଜଣ ହୋମ କ୍ବାରେଣ୍ଟାଇନରୁ ଚିହ୍ନଟ ହୋଇଥିବା ବେଳେ 46ଟି ସ୍ଥାନୀୟ ସଂକ୍ରମଣ ମାମଲା ସାମ୍ନାକୁ ଆସିଛି । ଧିରେ ଧିରେ ରାଜଧାନୀରେ କ୍ବାରେଣ୍ଟାଇନ କେନ୍ଦ୍ର ଅପେକ୍ଷା ସ୍ଥାନୀୟ ସଂକ୍ରମଣର ମାତ୍ରା ବଢୁଥିବା ଦେଖାଯାଉଛି । ଯାହା ବସ୍ତି ଅଞ୍ଚଳମାନଙ୍କରେ ବିପଦ ଘନାଉଥିବା ନେଇ ଆଶଙ୍କା ସୃଷ୍ଟି କରିଛି । ସେପଟେ ସ୍ଥାନୀୟ ସଂକ୍ରମଣରୁ ଚିହ୍ନଟ ମାମଲା ମଧ୍ୟରେ ଜାଗମରା, ୟୁନିଟ 3, ଘରୋଇ ହସ୍ପିଟାଲର କର୍ମଚାରୀ, ଝାରପଡା, ୟୁନିଟ 1, ଲକ୍ଷ୍ମୀସାଗର, କଳିଙ୍ଗ ବିହାର, ରସୁଲଗଡ, ଗୌତମନଗର, ବରମୁଣ୍ଡା ଓ କାନନ ବିହାରରୁ ଜଣେ ଲେଖାଏଁଙ୍କ ସମେତ ଶୈଳେଶ୍ବରୀ ବିହାରରୁ 2ଜଣ ରହିଥିବା ଜଣାପଡିଛି ।