ଭୁବନେଶ୍ବର: କଟକ ମୁଣ୍ଡୁଳୀ ବୋଟ ଟ୍ରାଜେଡ଼ିରେ ଓଡିଆ ଗଣମାଧ୍ୟମ ସଂସ୍ଥାର ବରିଷ୍ଠ ରିପୋର୍ଟର ଅରିନ୍ଦମ ଦାସଙ୍କ ପରଲୋକ ଘଟିଥିଲା । ତେବେ ତାଙ୍କ ଦେହାନ୍ତ ପରେ ପରିବାରକୁ ଅର୍ଥର ଆବଶ୍ୟକତା ରହିଛି ବୋଲି ସୋସିଆଲ ମିଡ଼ିଆରେ ଗୁଜବ ପ୍ରଚାର ହେଉଛି । ଯାହାକୁ ଖଣ୍ଡନ କରିଛନ୍ତି ଅରିନ୍ଦମଙ୍କ ଭଉଣୀ ଝରଣା ଦାସ । ତାଙ୍କ ପରିବାରକୁ ଆର୍ଥିକ ସହାୟତା ନୁହେଁ, ବରଂ ସହାନୁଭୂତି ଓ ସମର୍ଥନ ଆବଶ୍ୟକ ବୋଲି କହିଛନ୍ତି ଏବଂ ଏଭଳି ଗୁଜବକୁ ବନ୍ଦ କରିବା ପାଇଁ ସେ ଟ୍ବିଟ କରି ଅନୁରୋଧ କରିଛନ୍ତି ।
ଅରିନ୍ଦମଙ୍କ ଦେହାନ୍ତ ପରେ ତାଙ୍କ ପରିବାରକୁ ଜରୁରୀ ପରିସ୍ଥିତିରେ ଅର୍ଥର ଆବଶ୍ୟକତା ରହିଛି । ଏଭଳି କିଛି ଭିଡ଼ିଓ ସୋସିଆଲ ମିଡ଼ିଆରେ ପ୍ରଚାର ହେବାରେ ଲାଗିଛି । ସାହସୀ ସାମ୍ବାଦିକ ଅରିନ୍ଦମଙ୍କ ମୃତ୍ୟୁର ଏପରି ଫାଇଦା ନ ନେବା ପାଇଁ ଝରଣା ଅନୁରୋଧ କରିଛନ୍ତି । ତାଙ୍କ ଭାଇଙ୍କ ମୃତ୍ୟୁକୁ ଗୋଟିଏ ଉପହାସ୍ୟ ନ ବନାଇବା ପାଇଁ ସେ ଅନୁରୋଧ କରିଛନ୍ତି । ଏଭଳି ସ୍ଥିତିରେ ପରିବାର ସମ୍ପର୍କରେ ଚିନ୍ତା କରି ମାନବିକତା ଦେଖାଇବା ପାଇଁ ସେ ଟ୍ବିଟ କରି ଅନୁରୋଧ କରିଛନ୍ତି ।
ସେ ନିଜ ଟ୍ବିଟରେ ଲେଖିଛନ୍ତି ଯେ, ଅରିନ୍ଦମଙ୍କ ପରିବାର ଆର୍ଥିକ ସହାୟତା ଲୋଡୁଥିବା କଥା ସମ୍ପୂର୍ଣ୍ଣ ମିଥ୍ୟା । ଏଭଳି କଠିନ ପରିସ୍ଥିତିରେ ପରିବାରର ଦାୟିତ୍ବ ନେବା ପାଇଁ ସେମାନେ ସକ୍ଷମ । ତାଙ୍କ ପରିବାରରେ ସେମାନେ ୩ ଭଉଣୀ ଓ ୨ ଭାଇଙ୍କ ସମେତ ଅରିନ୍ଦମଙ୍କ ମାଆ, କାକା, ଖୁଡ଼ି, ଅରିନ୍ଦମଙ୍କ ପତ୍ନୀ ଓ ପୁତ୍ର ରହିଛନ୍ତି । ତାଙ୍କ ସ୍ବର୍ଗତଃ ପିତା ଜୁଗଳ କିଶୋର ଦାସ SBIରେ କାର୍ଯ୍ୟ କରୁଥିଲେ । ତାଙ୍କ ନିଷ୍ଠା ଓ ମାନବିକତା ପାଇଁ ସେ ସ୍ବତନ୍ତ୍ର ପରିଚୟ ପାଇଥିଲେ । ସେହିପରି ଶିକ୍ଷା ମଧ୍ୟ ପାଇଥିଲେ ଅରିନ୍ଦମ । ଅରିନ୍ଦମ ତାଙ୍କ କାର୍ଯ୍ୟ ପ୍ରତି ନିଷ୍ଠାବାନ ଥିଲେ ଯେଉଁଠି ସେ ଅର୍ଥଲୋଭରେ ପଡିନଥିଲେ ବୋଲି କହିଛନ୍ତି ଝରଣା ।
ସେ ଆହୁରି କହିଛନ୍ତି ଯେ ଅରିନ୍ଦମଙ୍କ ପତ୍ନୀ ଓ ସନ୍ତାନ ସହିତ ସମ୍ପୂର୍ଣ୍ଣ ପରିବାର ରହିଛି । ପରିବାରର କଠିନ ପରିସ୍ଥିତିରେ ଅରିନ୍ଦମଙ୍କ ପତ୍ନୀ ଓ ପୁତ୍ର କିପରି ସମ୍ମାନଜନକ ଜୀବନ ବିତାଇବେ ସେଥିଲାଗି ପରିବାର ଦାୟିତ୍ବ ନେଇଛି । ଅରିନ୍ଦମଙ୍କ ପରିବାରକୁ ଅର୍ଥର ଅଭାବ ନାହିଁ ବୋଲି ସେ ସ୍ପଷ୍ଟ କରିଛନ୍ତି । ଏଣୁ ଏଭଳି ଖବର ଉପରେ ବିଶ୍ବାସ ନ କରିବାକୁ ସେ ରାଜ୍ୟବାସୀଙ୍କୁ ମଧ୍ୟ ଅନୁରୋଧ କରିଛନ୍ତି । ପରିବାର ଏଭଳି କଠିନ ପରିସ୍ଥିତିରେ ଏସବୁ ଗୁଜବକୁ ସହ୍ୟ କରିବା ପରିସ୍ଥିତିରେ ନାହିଁ । ଏଣୁ ଏଗୁଡିକୁ ବନ୍ଦ କରିବାକୁ ସେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
