ବିନ୍ଦୁସାଗରରେ ବୋଇତ ବନ୍ଦାଣ, ଆ-କା-ମା-ବୈରେ କମ୍ପିଛୁ ପରିବେଶ

ଆଜି ପବିତ୍ର କାର୍ତ୍ତିକ ପୂର୍ଣ୍ଣିମା । ରାଜଧାନୀବାସୀ ଡଙ୍ଗାଭସାଇବାକୁ ବିନ୍ଦୁସାଗରରେ ଏକଜୁଟ ହୋଇଛନ୍ତି ଶ୍ରଦ୍ଧାଳୁ ।

ଭୁବନେଶ୍ବର: ଆଜି ପବିତ୍ର କାର୍ତ୍ତିକ ପୂର୍ଣ୍ଣିମା । ଓଡ଼ିଶାର ଆଚାର ବିଚାର, ଚାଲିଚଳଣି ତଥା ଧର୍ମୀୟ ଭାବନା ସହିତ ଏହି ପର୍ବ ଓତପ୍ରୋତ ଭାବେ ଜଡ଼ିତ । ଗୌରବମୟ ଉତ୍କଳର ପ୍ରାଚୀନ ଇତିହାସ ସହିତ ଏହା ନିବିଡ଼ ଭାବରେ ସଂପୃକ୍ତ । ଏହି ଅବସର ରାଜଧାନୀବାସୀ ମଧ୍ୟ ପବିତ୍ର ବିନ୍ଦୁସାଗରରେ ଏକଜୁଟ ହୋଇ ଡଙ୍ଗା ଭସାଇ ମନେପକାଇଛନ୍ତି ସେହି ପୁରୁଣା ଐତିହ୍ୟକୁ ।

ଏହି ପୂର୍ଣ୍ଣିମା ତିଥିରେ ନୌକାରେ ବସି ବାଲି, ଜାଭା, ସୁମିତ୍ରା ଆଦି ଦେଶକୁ ଯାଇ ସାଧବ ପୁଅ ମାନେ ବାଣିଜ୍ୟ କରୁଥିଲେ ।

ସେହି ଐତିହାସିକ ପରମ୍ପରାକୁ ମନେ ପକାଇ କାର୍ତ୍ତିକ ପୂର୍ଣ୍ଣିମାରେ ସାରା ଓଡ଼ିଶା ବାସୀ କଦଳୀ ପଟୁକାରେ ପାନ,ଗୁଆ, ଦୀପ,ଦୁବ, ରଖି ନିଜ ନିଜ ବୋଇତ ବା ଡଙ୍ଗା କୁ ପୂଜା କରି ନିକଟସ୍ଥ ନଦୀ ତୁଠରେ ଭସାଇଥାନ୍ତି । ସେପଟେ ଆଜି ହବିଷ୍ୟାଳି ବି ଗତ ମାସେ ଧରି ପାଳୁଥିବା ବ୍ରତକୁ ଉଜ୍ଜାପନ କରି ଠାକୁର ଦର୍ଶନ କରିବା ସହ ଘରକୁ ଫେରିଥାନ୍ତି ।

ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ