ଭୁବନେଶ୍ବର:ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟା ଭୂଷଣ ଆଜି ଭୁବନେଶ୍ୱରର ଚନ୍ଦ୍ରଶେଖରପୁର ଠାରେ ରେଳପଥର ଐତିହ୍ୟ ସଂଗ୍ରହାଳୟ "କଳିଙ୍ଗ ରେଳ ସଂଗ୍ରହାଳୟ"କୁ ଉଦ୍ଘାଟନ କରିଛନ୍ତି । ଆଜିର ଏହି କାର୍ଯ୍ୟକ୍ରମରେ ଅତିରିକ୍ତ ମହାପ୍ରବନ୍ଧକ ସୁଧୀର କୁମାର ଏବଂ ଖୋର୍ଦ୍ଧା ରୋଡ଼ ରେଳ ମଣ୍ଡଳର ମଣ୍ଡଳ ରେଳବାଇ ପ୍ରବନ୍ଧକ ରିଙ୍କେଶ ରୟ ଓ ରେଳପଥର ଅନ୍ୟ ପ୍ରମୁଖ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ ।
"କଳିଙ୍ଗ ରେଳ ସଂଗ୍ରହାଳୟ" ଉଦ୍ଘାଟିତ, ପୂର୍ବତଟ ରେଳବାଇର ଅତୀତ ଗୌରବ ହେବ ପ୍ରଦର୍ଶିତ ଭାରତୀୟ ରେଳ ବିଶେଷ ଭାବେ ପୂର୍ବତଟ ରେଳପଥର ଏକ ସମୃଦ୍ଧ ଏବଂ ଚମତ୍କାର ଇତିହାସ ରହିଛି । ପୁରୁଣା ରେଳ ଉପକରଣର ସଂରକ୍ଷଣ, ଏହି ଅଞ୍ଚଳରେ ରେଳବାଇର ସମୃଦ୍ଧ ଇତିହାସ ପ୍ରଦର୍ଶନ କରିବା, ରେଳବାଇ ଏବଂ ଏହାର ସଫଳତା ବିଷୟରେ ଜନସାଧାରଣଙ୍କୁ ଆଲୋକିତ କରିବା ଏବଂ ପର୍ଯ୍ୟଟନକୁ ବୃଦ୍ଧି କରିବା ଭୁବନେଶ୍ୱରରେ ଏହି ରେଳ ସଂଗ୍ରହାଳୟ ପ୍ରତିଷ୍ଠା କରିବାର ମୁଖ୍ୟ ଉଦ୍ଦେଶ୍ୟ ବୋଲି ପୂର୍ବତଟ ରେଳବଇ ପକ୍ଷରୁ କୁହାଯାଇଛି ।
ପୁରାତନ ଉପକରଣ, ଯନ୍ତ୍ର, ପ୍ରଯୁକ୍ତିବିଦ୍ୟା ଉପକରଣ ଏବଂ ମଡେଲଗୁଡିକ ମଧ୍ୟ ଏହି ଐତିହ୍ୟ ସଂଗ୍ରହାଳୟରେ କଳାକୃତି, ମଡେଲ ଏବଂ ଫଟୋଗ୍ରାଫଗୁଡିକର ଏକ ଚମତ୍କାର ପ୍ରଦର୍ଶନ ମାଧ୍ୟମରେ ସଂରକ୍ଷିତ କରାଯାଇଛି | ଭିତର ବିଭାଗରେ, ଭାରତର ରେଳବାଇର ପ୍ରଥମ ଦିନରୁ ବିଭିନ୍ନ ଦଲିଲ, ପୁରୁଣା ମାନୁଆଲ, ରେଳ ମାନଚିତ୍ର, ଉପକରଣ ଏବଂ ଫଟୋଗ୍ରାଫ୍ ପ୍ରଦର୍ଶିତ ହୋଇଛି ଯାହା ଦର୍ଶକଙ୍କୁ ଚମତ୍କାର ଇତିହାସ ଏବଂ ସମୃଦ୍ଧ ଐତିହ୍ୟ ଦର୍ଶାଇବାରେ ସହାୟତା କରିଛି ।
ଏଠାରେ ମଧ୍ୟ ବିଭିନ୍ନ ଡକ୍ୟୁମେଣ୍ଟାରୀ ସହିତ ରେଳବାଇ କର୍ମଚାରୀଙ୍କର ପୋଷାକ ପ୍ରଦର୍ଶନ ପାଇଁ ବ୍ୟବହୃତ ବୃତ୍ତି ଓ କଳାକୃତି ପରିଦର୍ଶକଙ୍କ ଆକର୍ଷଣ ପାଇଁ ରଖାଯାଇଛି । ଡାକଘର ଷ୍ଟାମ୍ପ ଏବଂ ବିଭିନ୍ନ ପୁରୁଣା ଷ୍ଟେଟ ରେଳବାଇ ଲୋଗୋର ଆର୍ଟିକ୍ୟୁଲେଟ୍ ପ୍ରଦର୍ଶନ ଦର୍ଶକଙ୍କୁ ବିଗତ ଦିନର ରେଳବାଇର କାର୍ଯ୍ୟଶୈଳୀକୁ ମନେପକାଇବା ସହ ରେଳବାଇର ସଂସ୍କୃତି ଏବଂ ଐତିହ୍ୟକୁ ମଧ୍ଯ ପୁନଃଜିବୀତ କରିବ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
