ଭୁବନେଶ୍ବର:ବିଭିନ୍ନ ଦାବି ନେଇ ଓଡ଼ିଶା କନିଷ୍ଠ ଶିକ୍ଷକ ସଂଘ ପକ୍ଷରୁ ମାଷ୍ଟରକ୍ୟାଣ୍ଟିନ ଛକରେ ବିକ୍ଷୋଭ ପ୍ରଦର୍ଶନ ଜାରି ରହିଛି । ଆଜି(ମଙ୍ଗଳବାର) ଦ୍ୱିତୀୟ ଦିନରେ ପହଞ୍ଚିଛି ଏହି ଆନ୍ଦୋଳନ । ମାଷ୍ଟରକ୍ୟାଣ୍ଟିନରେ ୨୨ ଟି ଜିଲ୍ଲାର ୧ ହଜାରରୁ ଅଧିକ କନିଷ୍ଠ ଶିକ୍ଷକ ସରକାରଙ୍କ ଅବହେଳା ବିରୋଧରେ କ୍ଷୋଭ ପ୍ରକାଶ କରିଛନ୍ତି । ୨୦୧୬ ମସିହାରେ ନିଯୁକ୍ତି ପାଇଁ ବିଜ୍ଞପ୍ତି ପ୍ରକାଶ ପାଇଥିଲା ଓ ପାଖାପାଖି ଦୁଇ ବର୍ଷ ପରେ ୨୦୧୮ ମସିହାରେ ସେମାନଙ୍କୁ ନିଯୁକ୍ତି ମିଳିଥିଲା ।
ବହୁ ଶିକ୍ଷକ ଶିକ୍ଷୟିତ୍ରୀ ୫ଶହ କିଲୋମିଟର ଦୂରରୁ ଆସି ଅନ୍ୟ ଜିଲ୍ଲାରେ ପାଠ ପଢ଼ାଉଛନ୍ତି । ମାତ୍ର ସେମାନଙ୍କୁ ଦରମା ନାମରେ ମାତ୍ର ୬୫୧୨ ଟଙ୍କା ମିଳୁଛି । ଯେତିକି ଦରମା ମିଳୁଛି ତାହା ଅଣକୁଶଳୀ ଶ୍ରମିକଙ୍କଠାରୁ କମ୍ । ୨୦୧୮ ଓ ୨୦୨୦ ମସିହାରେ ଚୁକ୍ତିଭିତ୍ତିକ ଆଉଟ୍ସୋର୍ସିଂ କର୍ମଚାରୀମାନଙ୍କ ପାରିଶ୍ରମିକ ୨୫ ପ୍ରତିଶତ ବୃଦ୍ଧି କରାଯାଇଥିବା ବେଳେ ଚଳିତ ବର୍ଷ କ୍ୟାବିନେଟ ବୈଠକରେ ଚୁକ୍ତିଭିତ୍ତିକ କର୍ମଚାରୀମାନଙ୍କର ପାରିଶ୍ରମିକ ୫୦ ପ୍ରତିଶତ ବୃଦ୍ଧି କରାଯାଇଛି । ଏଥିସହିତ ଚୁକ୍ତିଭିତ୍ତିକ ପ୍ରଥାକୁ ଉଚ୍ଛେଦ କରି ଇନିସିଆଲ୍ ଆପଏଣ୍ଟମେଣ୍ଟ ଭାବେ ଘୋଷଣା କରାଯାଇଛି ।