ଜେଲରେ ଆସିବ ସଂସ୍କାର, ସ୍ବାବଲମ୍ବୀ ହେବେ କଏଦୀ !

ଜେଲ ଏଡ଼ିଜି ଭାବେ ନୂଆକରି ଦାୟିତ୍ବ ନେଇଛନ୍ତି ସତ୍ୟଜିତ ମହାନ୍ତି । ରାଜ୍ୟରେ ଥିବା ସମସ୍ତ କାରାଗାରରେ ସଂସ୍କାର ମୂଳକ ପଦକ୍ଷେପ ନିଆଯିବ । କଏଦୀମାନଙ୍କୁ ସ୍ବାବଲମ୍ବୀ କରିବା ପାଇଁ ଜେଲ ମଧ୍ୟରେ ବିଭିନ୍ନ ନିଯୁକ୍ତି ସୁଯୋଗ ସୃଷ୍ଟି କରାଯିବ । ସୁରକ୍ଷା ବ୍ୟବସ୍ଥା ପାଇଁ ନୂଆ ଜ୍ଞାନକୌଶଳ ବ୍ୟବହାର କରାଯିବ ବୋଲି କହିଛନ୍ତି ସତ୍ୟଜିତ ମହାନ୍ତି ।

ଭୁବନେଶ୍ବର: ରାଜ୍ୟରେ ଥିବା ସମସ୍ତ କାରାଗାରକୁ ସଂସ୍କାରିତ କରାଯିବ । ବିଭିନ୍ନ ଜେଲରେ ଥିବା 19 ହଜାର କଏଦୀଙ୍କ ପାଇଁ ସୃଷ୍ଟି ହେବ ନିଯୁକ୍ତି ସୁଯୋଗ । ଯାହା ଫଳରେ ସେମାନେ ସ୍ବାବଲମ୍ବୀ ହେବା ସହ ଜେଲରୁ ମୁକୁଳିବା ପରେ ସମାଜର ମୁଖ୍ୟ ସ୍ରୋତରେ ସାମିଲ ହୋଇପାରିବେ ବୋଲି ନୂଆକରି ଦାୟିତ୍ବ ନେଇଥିବା ଜେଲ ଏଡ଼ିଜି ସତ୍ୟଜିତ ମହାନ୍ତି ପ୍ରକାଶ କରିଛନ୍ତି ।

ଜେଲରେ ରହୁଥିବା କଏଦୀମାନଙ୍କ ପାଇଁ ଉତ୍ତମ ଏବଂ ପର୍ଯ୍ୟାପ୍ତ ଖାଦ୍ୟ ଯୋଗାଇ ଦେବା ପାଇଁ ପ୍ରୟାସ ରହିବ । ସେହିପରି ଅଧିକାଂଶ କାରାଗାରରେ ନୂଆ ଜ୍ଞାନକୌଶଳ ବିନିଯୋଗ କରାଯିବ । ଯେପରି ଭିଡ଼ିଓ କନଫରେନ୍ସି ମାଧ୍ୟମରେ କଏଦୀ ମାନଙ୍କର ବୟାନ ନିଆଯିବ । ସେମାନେ ଜେଲରୁ କୋର୍ଟକୁ ଆସିବାକୁ ପଡ଼ିବ ନାହିଁ ଏବଂ ସୁରକ୍ଷା ବ୍ୟବସ୍ଥା ପାଇଁ ବିପଦ ସୃଷ୍ଟି ହେବ ନାହିଁ । 60ରୁ ଅଧିକ ଜେଲରେ ଏହି ବ୍ୟବସ୍ଥା ଲାଗୁ କରାଯିବା ପାଇଁ ଯୋଜନା ରହିଥିବାବେଳେ 48 କାରାଗାରରେ ବ୍ୟବସ୍ଥା କାର୍ଯ୍ୟକାରୀ କରାଯିବାକୁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଥିବା କହିଛନ୍ତି ଏଡ଼ିଜି ।

ଏହାସହ ଜେଲରେ ସୁରକ୍ଷା ବ୍ୟବସ୍ଥା କଡାକଡ଼ି କରାଯିବ । ଅପରାଧି ମାନଙ୍କର ତଥ୍ୟକୁ ସୁରକ୍ଷିତ ରଖିବା ପାଇଁ ନୂଆ ଟେକନୋଲୋଜି ବ୍ୟବହାର କରାଯିବ । ଜେଲ ମଧ୍ୟରେ କଏଦୀ ମାନଙ୍କ ପାଇଁ ବିଭିନ୍ନ ନିଯୁକ୍ତି ସୃଷ୍ଟି ହେବ । ଫଳରେ ସେମାନେ ଦକ୍ଷତା ହାସଲ କରିପାରିବେ । ନୂଆକରି ଦାୟିତ୍ବ ନେଲା ପରେ ଜେଲ କ୍ଷେତ୍ରରେ ଏହିପରି ସଂସ୍କାର ମୂଳକ ପଦକ୍ଷେପ ଆରମ୍ଭ କରିବେ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି ସତ୍ୟଜିତ ମହାନ୍ତି ।

ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ