ଭୁବନେଶ୍ବର: ନୂଆ ବର୍ଷରେ ‘ମୋ ସରକାର’ ଅଧିନକୁ ଆସିବ ଶ୍ରମ ବିଭାଗ। ଏହା ମାଧ୍ୟମରେ ସରକାର ଗୋଟିଏ ପରେ ଗୋଟିଏ ଯୋଜନାକୁ ସାମିଲ କରୁଛନ୍ତି। ସେଥିପାଇଁ ଶ୍ରମ ବିଭାଗରେ କିପରି ସ୍ବଚ୍ଛତା ସହ ଶ୍ରମିକଙ୍କୁ ସରକାରୀ ସୁବିଧା ମିଳିପାରିବ, ମଧ୍ୟସ୍ଥି ରହିବେନି, ସେ ନେଇ ପ୍ରସ୍ତୁତି ଚାଲିଛି। ଶ୍ରମ ଅଧିକାରୀଙ୍କ ରାଜ୍ୟସ୍ତରୀୟ ସମୀକ୍ଷା ବୈଠକ ଓ ‘ମୋ ସରକାର’ ସଚେତନତା କର୍ମଶାଳାରେ ଏହି ସୂଚନା ଦେଇଛନ୍ତି ନିର୍ମାଣ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ସୁବାଷ ସିଂ।
ଦାଦନ ରୋକିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖୁବ ଶୀଘ୍ର ବଡ ଘୋଷଣା କରିବେ। 11ଟି ଜିଲ୍ଲାକୁ ଦାଦନ ପ୍ରବଣ ଜିଲ୍ଲା ଭାବେ ଚିହ୍ନଟ କରାଯାଇଛି। ଜାନୁଆରୀରେ ଶ୍ରମ ବିଭାଗ ସାମିଲ ହେବ ‘ମୋ ସରକାର’ ଯୋଜନାରେ। ଯେଉଁ ସରକାରୀ ଅଧିକାରୀ ଚଞ୍ଚକତା କରୁଥିବେ, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ। ଦଲାଲଙ୍କ ଦ୍ବାରା ଶ୍ରମିକ ଯେମିତି ନିର୍ଯ୍ୟାତିତ ନହେବେ ସେ ନେଇ ବିଭାଗ ସଚେତନ ଅଛି। ଦଲାଲଙ୍କ ଖବର ମିଳିଲେ ତୁରନ୍ତ ପଦକ୍ଷେପ ନିଆଯାଉଛି। 5 ରାଜ୍ୟରେ ଓଡିଶା ଶ୍ରମିକଙ୍କ ପାଇଁ ହେଲ୍ପ ଡେସ୍କ ଖୋଲାଯାଇଛି। ସେଗୁଡିକ ହେଲା ଆନ୍ଧ୍ରପ୍ରଦେଶ, ତେଲେଙ୍ଗାନା, କର୍ଣ୍ଣାଟକ, ତାମିଲନାଡୁ ଓ ଦିଲ୍ଲୀ। ବିଦେଶକୁ ଯାଉଥିବା ଶ୍ରମିକଙ୍କ ପାଇଁ କେନ୍ଦ୍ର ବୈଦେଶିକ ମନ୍ତ୍ରଣାଳୟ ସହ ସମନ୍ବୟ ରକ୍ଷା କରିବାକୁ ଦିଲ୍ଲୀଠାରେ ସ୍ବତନ୍ତ୍ର ଡେସ୍କ ଖୋଲିବା ପାଇଁ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛୁ ବୋଲି କହିଛନ୍ତି ବିଭାଗୀୟ ମନ୍ତ୍ରୀ ସୁଶାନ୍ତ ସିଂ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ