ଭୁବନେଶ୍ବର: ଆତଙ୍କ ଖେଳାଇଲେ ଡକାୟତି ଗ୍ୟାଙ୍ଗ୍ । ଗ୍ରିଲ୍ ତାଡି ରାତି ଅଧରେ ଘରେ ପଶିଲେ । ଆଉ ଲୁଟିଲେ ଘରେ ଥିବା ଗହଣା ଓ ଟଙ୍କା । ଧଉଳି ଥାନା ନୂଆଗାଁରେ ଘଟିଛି ଏହି ଘଟଣା । ଗତ ୫ତାରିଖ ରାତିରେ ଗାୟତ୍ରୀ ପଣ୍ଡାଙ୍କ ଘରେ ପଶି କିଛି ଅଣ ଓଡିଆ ଲୁଟେରା ଏପରି କାଣ୍ଡ ଘଟାଇଥିବା ଜଣାପଡ଼ିଛି ।
ରାଜଧାନୀରେ ରାଜ୍ୟ ବାହାର ଅପରାଧୀ, ରାତିଅଧିଆ ଲୁଟିଲେ ୧୫ ଲକ୍ଷ
୫ଜଣ ଦୁର୍ବୃତ୍ତ ହିନ୍ଦୀରେ କଥାବାର୍ତ୍ତା କରୁଥିଲେ । ପରେ ମାଆ ଓ ଝିଅଙ୍କୁ ଧମକ ଦେଇ ୩ଟି ସୁନା ଚେନ୍ ସହ ୨ଟି ହାତ ଶଙ୍ଖା, ୫ଟି ମୁଦି ଓ ୬ଟି କାନଫୁଲ ସହ କିଛି ନଗଦ ଟଙ୍କା ନେଇଯାଇଥିବା ଅଭିଯୋଗ ହୋଇଛି । 'ଦିଦି ଜୋ ହେ ଦେ ଦୋ' ବୋଲି କହିଥିଲେ । ଖବର ପାଇବା ପରେ ପୋଲିସ ଫରେନସିକ୍ ଟିମ ପହଞ୍ଚି ତନାଘନା କରିଛି । ଏପରିକି ପାଖରେ ଥିବା CCTV ସହ ସ୍ଥାନୀୟ ଲୋକଙ୍କୁ ପଚରାଉଚରା କରିଛି ପୋଲିସ । ଏନେଇ ଭୁବନେଶ୍ବର DCP ପ୍ରତୀକ ସିଂ କହିଛନ୍ତି ଯେ ଘଟଣାର ତର୍ଜମା ଚାଲିଛି ।