ଭୁବନେଶ୍ବର: ପାଣି କେବେ ସୁନ୍ଦରୀ ରାଣୀ, କେବେ ବୁଢୀ ଅସୁରଣୀ । କେବେ ଶାନ୍ତ, ସ୍ଥିର ତ କେବେ ଗମ୍ଭୀର ଗର୍ଜନଶୀଳ । କେବେ ବିଶ୍ବାସୀ ପୁଣି କେବେ ଅବିଶ୍ବାସୀ । ତେବେ ବର୍ତ୍ତମାନ ସମୟରେ କୁଳୁ କୁଳୁ ନାଦରେ ବହିଯାଉଥିବା ନଦୀ ସାଜିଛନ୍ତି ବିପଦ । ଗ୍ରୀଷ୍ମରେ ଖୁଖିଲା ପଡିଥିବା ନଦୀ ବର୍ଷା ବଳରେ ବଳୀୟାନ । କରାଳ ରୂପରେ ଡରାଉଛନ୍ତି । ପ୍ରବଳରୁ ଅତି ପ୍ରବଳ ବର୍ଷାରେ ଭୀଷଣ ରୂପ ଧାରଣ କରିଛନ୍ତି । ଏପରିକି ପ୍ରବଳ ବର୍ଷା କାରଣରୁ ଏବେ ସୃଷ୍ଟି ହୋଇଛି ବନ୍ୟା ବିତ୍ପାତ ।
ବନ୍ୟାରେ ବେହାଲ ଜନଜୀବନ
ଏହି ବନ୍ୟା ଫଳରେ ଫନି ବାତ୍ୟାର କ୍ଷତ ନ ଶୁଖୁଣୁ ଦକ୍ଷିଣ ଓଡିଶା ବେହାଲ । ସ୍ଥିତି ସଙ୍ଗୀନ । ଶହ ଶହ ଗାଁ ଜଳମଗ୍ନ ଓ ଲକ୍ଷ ଲକ୍ଷ ଲୋକ ପ୍ରଭାବିତ । କୋରାପୁଟ, କନ୍ଧମାଳ, ମାଲକାନଗିରି, କଳାହାଣ୍ଡି, ଗଜପତି, ନବରଙ୍ଗପୁର ଓ ରାୟଗଡ଼ାରେ ବନ୍ୟା ସ୍ଥିତି ସାଙ୍ଘାତିକ । ଜଳ ଘେରରେ ଜନ, ଜୀବନ, ଜନ୍ତୁ, ଜୀବିକା । ଯାତାୟାତ ଠପ୍, ବର୍ଷା, ବନ୍ୟା ଯନ୍ତ୍ରଣାରେ ଜର୍ଜରିତ ଲୋକେ ।