ଭୁବନେଶ୍ବର: ସହରରେ ମାତିଲେ ଚୁଟିକଟା ଡକାୟତି ଗ୍ୟାଙ୍ଗ, ରାଜଧାନୀରେ ବନ୍ଧୁକ ମୁନରେ ଲୁଟିଲେ ଆପାର୍ଟମେଣ୍ଟ । ଆତଙ୍କ ମଚାଇଲେ ଚୁଟିକଟା ଗ୍ୟାଙ୍ଗ। ହିନ୍ଦୀରେ କଥାବାର୍ତ୍ତା କରୁଥିବା ୪ ରୁ ୫ ଜଣ ଦୁବୃର୍ତ୍ତ ଡକାୟତି କରିଛନ୍ତି ଶହୀଦନଗର ଥାନା ଅଞ୍ଚଳର ନିଗମ ନଗରରେ ।
ସୋମବାର ରାତିରେ ରାଜଧାନୀର ଶହୀଦନଗର ଥାନା ନିଗମ ନଗରର ଲେନ ୨ ରେ ଥିବା ସୁରକ୍ଷା ଆପାର୍ଟମେଣ୍ଟରେ ପଶିଥିଲେ । ଆପାର୍ଟମେଣ୍ଟର ସିକ୍ୟୁରିଟି ଗାର୍ଡର ମୁଣ୍ଡରେ ବନ୍ଧୁକ ଲଗାଇ ଧମକାଇବା ସହ ଆପାର୍ଟମେଣ୍ଟରେ ସୁପରଭାଇଜର ରୁମରେ ପଶି ଖେଳାଇଛନ୍ତି ଆତଙ୍କ । ସୁପରଭାଇଜର ଟଙ୍କା ଓ ମୋବାଇଲ ଲୁଟ ସହ ଆପାର୍ଟମେଣ୍ଟର ରହୁଥିବା ଅବସରପ୍ରାପ୍ତ ଓଏଏସ ବିକର୍ତନ ପୋଥାଳଙ୍କୁ ବାହାରପଟୁ ତାଲା ପକାଇଥିଲେ। ପରେ ପାର୍କିଂରେ ଥିବା ସିଆଜ କାର ସହ ଟଙ୍କା ଓ ସ୍କୁଟି ନେଇ ଚମ୍ପଟ ମାରିଛନ୍ତି ଦୁବୃର୍ତ୍ତ ।
ଘଟଣାସ୍ଥଳରେ ସ୍ପେଶାଲ ସ୍କ୍ବାର୍ଡ ସହ ସହିଦନଗର ଥାନା ପହଞ୍ଚି ତନାଘନା ଆରମ୍ଭ କରିଛି । ଘଟଣାସ୍ଥଳକୁ ଯାଇ ଅବସରପ୍ରାପ୍ତ ଓଏଏସଙ୍କ ଘରେ ପଚରାଉଚରା ସହ ସିସିଟିଭି ଫୁଟେଜ ଯାଞ୍ଚ କରିଛନ୍ତି। ଏଥି ସହ ଆପାର୍ଟମେଣ୍ଟକୁ ଏଣ୍ଟ୍ରି ଓ ଏକଜିଟ ସିସିଟିଭି ଫୁଟେଜ ଚେକ ସହ ଗ୍ୟାଙ୍ଗର କାରନାମା ସମ୍ପର୍କରେ ଜାଣିବାକୁ ପାଇଛନ୍ତି। ଏଭଳି ଅପରାଧ ଓ ଗ୍ୟାଙ୍ଗର ଡକାୟତି ପ୍ରଥମ ଥର ଦେଖିବାକୁ ମିଳିଥିବା ବେଳେ ହିନ୍ଦୀରେ କଥାବାର୍ତ୍ତା ଓ ସୁପରଭାଇଜର ଚୁଟି କାଟିବା ତରିକାକୁ ନେଇ ପୋଲିସ କେଉଁ ଗ୍ୟାଙ୍ଗ ବୋଲି ସନ୍ଦେହ କରୁଛି । କାରଣ ପୂର୍ବରୁ ଅନେକ ଗ୍ୟାଙ୍ଗର ଡକାୟତି ବା ଲୁଟ ବେଳେ ଏଭଳି କିଛି କାରନାମା ଦେଖିବାକୁ ମିଳିଛି।