ଭୁବନେଶ୍ବର: ବିବାହ କିମ୍ବା ବ୍ରତଘର କରୁଛନ୍ତି କି, ହୋଇଯାନ୍ତୁ ସତର୍କ! କାରଣ ଅତିଥି ବେଶରେ ଆସୁଛନ୍ତି ଚୋର । ଲୁଟୁଛନ୍ତି ଘର ଓ ଗିଫ୍ଟ ଆଇଟମ । ଏଭଳି ଘଟଣା ଘଟିଛି ରାଜଧାନୀ ଭୁବନେଶ୍ବରର ବିଭିନ୍ନ ଥାନା ଅଞ୍ଚଳରେ ଥିବା ମଣ୍ଡପରେ । ଏନେଇ ବିଭିନ୍ନ ଥାନାରେ ଅଭିଯୋଗ ହେବା ପରେ ଚନ୍ଦ୍ରଶେଖରପୁର ଥାନା ଅଞ୍ଚଳରୁ ଆସିଛି ରୋଚକ ତଥ୍ୟ ।
ଗତ ଫେବୃଆରୀ ୨୯ ତାରିଖରେ ଝାରପଡା ରାଜେନ ମହାନ୍ତିଙ୍କ ପୁଅର ବିବାହ ଭୋଜି ଥିଲା । ଏହି ସମୟରେ ସିଧାସାଧା ଚିକ୍କଣ ପୋଷାକ ପିନ୍ଧି ଅତିଥି ପରି ଏଣ୍ଟ୍ରି ମାରିଥିଲା ଲୁଟେରା । ଭୋଜି ଖାଇବା ସହ ସମ୍ପର୍କୀୟଙ୍କ ଗହଣରେ ବୁଲିଥିଲା । ଆଉ ଫଟୋ ଉଠାଇବାରେ ପରିବାରର ସଦସ୍ୟ ବ୍ୟସ୍ତ ଥିବା ସମୟରେ ସମସ୍ତଙ୍କ ନଜରରୁ ବଞ୍ଚି ମୌକା ଦେଖି ଚୌକା ମାରିଥିଲା ଲୁଟେରା । ସେପଟେ ଅତିଥି ମାନେ ଦେଇଥିବା ଗିଫ୍ଟ ବ୍ୟାଗ ଚୋରି ହେବା ପରେ ବିବାହ ମଣ୍ଡପରେ ଲାଗିଥିବା ସିସିଟିଭିର ଯାଞ୍ଚ କରିଥିଲେ ରାଜେନ । ଆଉ ଏହା ପରେ ଲୁଟେରାର କଳା କାରନାମା ଚିତ୍ର ସାମନାକୁ ଆସିଥିଲା । ଘଟଣାସମ୍ପର୍କରେ ରାଜେନ ଚନ୍ଦ୍ରଶେଖର ଥାନାରେ ଅଭିଯୋଗ କରିଥିବା ସୂଚନା ମିଳିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
