ଭୁବନେଶ୍ବର: କେନ୍ଦ୍ର ଅର୍ଥମନ୍ତ୍ରୀ ଆଜି(ସୋମବାର) ୬.୨୮ ଲକ୍ଷ କୋଟି ମୂଲ୍ୟର ଆର୍ଥିକ ପ୍ୟାକେଜ ଘୋଷଣା କରିଛନ୍ତି । ଏହି ପ୍ୟାକେଜ ଦେଶରେ ସ୍ବାସ୍ଥ୍ୟ ଭିତ୍ତିଭୂମିକୁ ସୁଦୃଢ଼ କରିବା, ରପ୍ତାନୀକୁ ଗତି ଦେବା ସହ ରୋଜଗାର ପ୍ରଦାନ କରିବ । ମହାମାରୀର ଦ୍ବିତୀୟ ଲହର ଯୋଗୁଁ ଆର୍ଥିକ ସଙ୍କଟକୁ ମୁକାବିଲା କରିବା ପାଇଁ ଏହି ପଦକ୍ଷେପ ନିଆଯାଇଛି । ଏହି ପ୍ୟାକେଜ ଘୋଷଣା କରିଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଧନ୍ୟବାଦ ଜଣାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଧର୍ମେନ୍ଦ୍ର କହିଛନ୍ତି ଯେ, ଆତ୍ମନିର୍ଭର ରୋଜଗାର ଯୋଜନାର ସମ୍ପ୍ରସାରଣ ଲାଗି ଏହି ଆର୍ଥିକ ପ୍ୟାକେଜ ବେଶ ଉପଯୋଗୀ । କୋଭିଡ ପ୍ରଭାବିତ ଅଞ୍ଚଳରେ ଋଣ ସୁବିଧା ଚାଷୀ, ଗରିବ, MSME, ସ୍ଵାସ୍ଥ୍ୟ ଭିତ୍ତିଭୂମିକୁ ସୁଦୃଢ଼ ଏବଂ ମହାମାରୀ ଯୋଗୁଁ ଉତ୍ପନ୍ନ ହୋଇଥିବା ସ୍ଥିତିକୁ ମୁକାବିଲା କରିବା ପାଇଁ ୬.୨୮ ଲକ୍ଷ କୋଟି ସହାୟତା ରାଶି ନିଶ୍ଚିତ ଭାବରେ ସହାୟକ ହେବ । ସେହିପରି ପର୍ଯ୍ୟଟନ କ୍ଷେତ୍ରରେ ଷ୍ଟେଜ୍ ହୋଲଡର ମାନଙ୍କୁ ଆର୍ଥିକ ସହାୟତା, ଏମଏଫଆଇ ମାଧ୍ୟମରେ ଋଣ ଧାର ନେଇଥିବା ୨୫ ଲକ୍ଷ ବ୍ୟକ୍ତିଙ୍କ ପାଇଁ କ୍ରେଡ଼ିଟ ଆଉଟରିଚ୍ ଏବଂ ଡ଼ିଜିଟାଲ ଇଣ୍ଡିଆ ସମେତ ଅର୍ଥନୀତି କ୍ଷେତ୍ରରେ ମଧ୍ୟ ଅଭିବୃଦ୍ଧି ଘଟିବ ବୋଲି ଧର୍ମେନ୍ଦ୍ର କହିଛନ୍ତି ।